കൊണ്ടോട്ടി- കരിപ്പൂരില്‍നിന്ന് ദുബായ് വിമാനം റദ്ദാക്കിയതിനെ തുടര്‍ന്ന് വിമാനത്താവളത്തില്‍ യാത്രക്കാരുടെ പ്രതിഷേധം. ദുബായിലേക്കുളള സ്‌പൈസ്‌ജെറ്റ് വിമാനമാണ് അവസാന നിമിഷം റദ്ദാക്കിയതാണ് യാത്രക്കാരുടെ പ്രതിഷേധത്തിനിടയാക്കിയത്.
വിമാനം ശനിയാഴ്ച പുലര്‍ച്ചെ 1.30ന് പുറപ്പെടുമെന്നാണ് ആദ്യം യാത്രക്കാരെ അറിയിച്ചിരുന്നത്. ഇത് പിന്നീട് വൈകിട്ട്് 7.05ന് ലേക്ക് മാറ്റി. ഈ വിമാനത്തില്‍ പുറപ്പെടാന്‍ എത്തിയ യാത്രക്കാരോടാണ് വിമാനം വീണ്ടും റദ്ദാക്കിയിട്ടുണ്ടെന്നും ഞായറാഴ്ച രാവിലെ എട്ടിന് പുറപ്പെടുമെന്നും വിമാന കമ്പനി അറയിച്ചത്. ഇതനുസരിച്ച് ഞായറാഴ്ച എത്തിയപ്പോള്‍ ആദ്യം രാവിലെ 11നും പിന്നീട് ഉച്ചക്കും പുറപ്പെടുമെന്ന് പറയുകയായിരുന്നു. പിന്നീട് വൈകിയിട്ടോടെയാണ് വിമാനം റദ്ദാക്കിയതായി വിവരം ലഭിച്ചത്. ഇതോടെ യാത്രക്കാര്‍ വിമാന കമ്പനി ഓഫീസിന് മുന്നില്‍ പ്രതിഷേധിച്ചു.130 പേരാണ് വിമാനത്തില്‍ പോകാനായി എത്തിയത്.
സാങ്കേതിക തകരാറിനെ തുടര്‍ന്ന് വിമാനം ദല്‍ഹിയില്‍നിന്ന് എത്തിയിട്ടില്ലെന്നാണ് യാത്രക്കാരെ അറിയിച്ചിരിക്കുന്നത്. വിമാനം വൈകിയതിനെ തുടര്‍ന്ന് താമസ സൗകര്യവും, നഷ്ടപരിഹാരവും വിമാന കമ്പനി നല്‍കിയില്ലെന്ന് യാത്രക്കാര്‍ പറഞ്ഞു. ടിക്കറ്റ് എടുത്തവര്‍ കോവിഡ് ആര്‍.ടി.പി.സി.ആര്‍ പരിശോധന നടത്തിയിരുന്നു. യാത്ര മുടങ്ങിയതോടെ ഇവര്‍ക്ക് വീണ്ടും കൊവിഡ് പരിശോധന നടത്തേണ്ട ഗതികേടാണ്.
