ന്യൂദൽഹി- നിയമസഭാ തെരഞ്ഞെടുപ്പിൽ 35 സീറ്റ് കിട്ടിയാൽ കേരളത്തിൽ സർക്കാരുണ്ടാക്കുമെന്ന വാദം ആവർത്തിച്ച് ബിജെപി സംസ്ഥാന പ്രസിഡന്‍റ് കെ. സുരേന്ദ്രൻ പറഞ്ഞു. തെരഞ്ഞെടുക്കപ്പെടുന്ന സർക്കാരുകളെ അട്ടിമറിക്കാന്‍ ആഭ്യന്തര മന്ത്രി അമിത് ഷാ തന്ത്രങ്ങള്‍ പുറത്തെടുക്കുമെന്ന വിവാദം നിലനില്‍ക്കുന്നതിനിടെയാണ് കെ.സുരേന്ദ്രന്‍ ആവർത്തിക്കുന്നത്.
ഉമ്മൻചാണ്ടിയെ പോലുള്ള കരുത്തരായ സ്ഥാനാർഥികൾ നേമത്ത് വരട്ടെയെന്നും ശക്തനായ സ്ഥാനാർഥിയെ സ്വാഗതം ചെയ്യുന്നുവെന്നും കെ. സുരേന്ദ്രൻ പറഞ്ഞു.
നേമത്ത് ബിജെപിയും സിപിഎമ്മും തമ്മിലാണ് മത്സരം. നേമത്ത് ആര് വിചാരിച്ചാലും പരാജയപ്പെടുത്താനാകില്ല. നേമം ബിജെപിയുടെ ഉറച്ച കോട്ടയാണെന്നും സുരേന്ദ്രൻ അവകാശപ്പെട്ടു.
മുഖ്യമന്ത്രി പിണറായി വിജയൻ മത്സരിക്കുന്ന ധർമ്മടത്ത് ശക്തനായ സ്ഥാനാർഥിയെ നിർത്തും. ഉമ്മൻചാണ്ടിയുടെ ഇപ്പോഴത്തെ മണ്ഡലമായ പുതുപ്പള്ളിയിലും ചെന്നിത്തലയുടെ മണ്ഡലമായ ഹരിപ്പാടും ശക്തരായ സ്ഥാനാർഥികളുണ്ടാകുമെന്നും സുരേന്ദ്രൻ അറിയിച്ചു.
