തലശ്ശേരി- നിയമസഭാ തെരഞ്ഞെടുപ്പിനോട് അനുബന്ധിച്ച് പോലീസും അർധസൈനിക വിഭാഗവും ചേർന്ന് തലശ്ശേരിയിൽ റൂട്ട് മാർച്ച് നടത്തി.
ഇല്ലത്ത് താഴെ ഉക്കണ്ടൻപീടികക്ക് സമീപത്ത് നിന്ന് ആരംഭിച്ച റൂട്ട് മാർച്ച് ബാങ്ക് ഓഡിറ്റോറിയത്തിന് സമീപം സമാപിച്ചു. സ്ഥാനാർഥികൾ കളത്തിലിറങ്ങുന്നതോടെ കണ്ണൂർ ജില്ലയിലെ മുഴുവൻ നിയോജക മണ്ഡലങ്ങളിലും പ്രചാരണം തീപ്പാറുമെന്ന് ഉറപ്പാണ്. മുഖ്യമന്ത്രി പിണറായി വിജയൻ ഇന്ന് വൈകിട്ട് കണ്ണൂർ വിമാനത്താവളത്തിലെത്തുന്നുണ്ട്. പാർട്ടി പ്രവർത്തകർ എട്ട് കേന്ദ്രങ്ങളിൽ സ്വീകരണവുമൊരുക്കിയിട്ടുണ്ട്.
ചൊവ്വാഴ്ച മുതൽ മണ്ഡലത്തിൽ പിണറായി പ്രചാരണത്തിനിറങ്ങും. കള്ളക്കടത്ത് വിവാദങ്ങളും പി.ജയരാജനെ ഒതുക്കിയെന്ന സി.പി.എം പ്രവർത്തകരുടെ രോഷവും ഇക്കുറി കണ്ണൂരിനെ ഇളക്കിമറിക്കും.
ഈ സാഹചര്യവും കൂടി കണക്കിലെടുത്താണ് അനിഷ്ട സംഭവങ്ങളൊഴിവാക്കാൻ പോലീസും അർധസൈനിക വിഭാഗവും ചേർന്ന് തലശ്ശേരിയിൽ റൂട്ട് മാർച്ച് നടത്തിയത്. സി.ഐ ഗോപകുമാർ, എസ്.ഐ അഷ്‌റഫ്.എ, അഡീഷണൽ എസ്.ഐമാരായ ജഗ്ജീവൻ, വേണുഗോപാൽ, കെ.സുനിൽകുമാർ തുടങ്ങിയവർ നേതൃത്വം നൽകി.
