ലണ്ടൻ- ഇംഗ്ലീഷ് പ്രീമിയർ ലീഗ് ഫുട്‌ബോളിൽ മാഞ്ചസ്റ്റർ സിറ്റിക്ക് ജയം. സെൽഫ് ഗോളിലൂടെ പിറകിൽ പോയ ശേഷമായിരുന്നു ഹഡേഴ്‌സ്ഫീൽഡ് ടൗണിനെതിരെ സിറ്റിയുടെ തിരിച്ചുവരവ്. നാൽപത്തിയാറാമത്തെ മിനിറ്റിലാണ് നികോളാസ് ഓടമെൻഡിയിലൂടെ സെൽഫ് ഗോൾ വഴങ്ങിയത്. എന്നാൽ തൊട്ടടുത്ത മിനിറ്റിൽ ലഭിച്ച പെനാൽറ്റിയിലൂടെ സെർജിയോ അഗ്യൂറോ സിറ്റിയെ ഒപ്പമെത്തിച്ചു. കളി തീരാൻ ആറുമിനിറ്റ് ശേഷിക്കെ റഹീം സ്റ്റെർലിംഗിലൂടെ സിറ്റി വിജയ ഗോൾ നേടി.
മറ്റൊരു മത്സരത്തിൽ ആഴ്‌സണൽ ബേണ്‌ലി എഫ്.സിയെ തോൽപ്പിച്ചു. അലക്‌സിസ് സാഞ്ചെസ് 92-ാം മിനിറ്റിൽ പെനാൽറ്റിയിലൂടെ നേടിയ ഗോളാണ് ആഴ്‌സണലിന് രക്ഷയായത്.
എവർടൺ എഫ്.സിക്കെതിരെ സൗത്താംപ്ടണിന്റേത് മികച്ച ജയമായിരുന്നു. ഒന്നിനെതിരെ നാലു ഗോളുകൾക്കാണ് സൗത്താംപ്ടൺ ജയിച്ചത്. പതിനെട്ടാമത്തെ മിനിറ്റിലാണ് ഡുസാൻ ടാഡികിലൂടെ സൗത്താംപ്ടൺ മുന്നിലെത്തിയത്. എന്നാൽ പകുതി സമയം തീരാൻ നിമിഷങ്ങൾ ശേഷിക്കേ ജിൽഫി സിഗുർഡ്‌സൻ സമനില ഗോൾ നേടി. രണ്ടാം പകുതിയുടെ ആദ്യം തന്നെ ചാർളി ഓസ്റ്റിൻ ഒരു ഗോൾ നേടി സൗത്താംപ്ടണിനെ മുന്നിലെത്തിച്ചു. അൻപത്തിയെട്ടാം മിനിറ്റിൽ ചാർളി രണ്ടാം ഗോളും നേടി. കളി തീരാൻ മൂന്നു മിനിറ്റ് മാത്രം ബാക്കിനിൽക്കേയാണ് സ്റ്റീവൻ ഡേവിസ് നാലാം ഗോൾ നേടി സൗത്താംപ്ടണിന് മികച്ച ജയം സമ്മാനിച്ചത്.
