തിരുവനന്തപുരം- അന്താരാഷ്ട്ര തലത്തിൽ പബ്ലിക് പോളിസി വിദഗ്ധനും പ്രമുഖ സാമൂഹിക, മനുഷ്യാവകാശപ്രവർത്തകനുമായ ജോൺ സാമുവലിനെ കെ.പി.സി.സി പുതിയതായി തുടങ്ങിയ പബ്ലിക് പോളിസി വിഭാഗത്തിന്റ അധ്യക്ഷനായി നിയമിച്ചതായി കെ.പി.സി.സി ജനറൽ സെക്രട്ടറി കെ.പി. അനിൽകുമാർ അറിയിച്ചു.
എ.ഐ.സി.സി ജനറൽ സെക്രട്ടറിമാരായ കെ സി വേണുഗോപാൽ, താരിഖ് അൻവർ, കെപിസിസി പ്രസിഡന്റ് മുല്ലപ്പള്ളി രാമചന്ദ്രൻ, പ്രതിപക്ഷ നേതാവ് രമേശ് ചെന്നിത്തല, മുൻമുഖ്യമന്ത്രി ഉമ്മൻ ചാണ്ടി എന്നിവരുടെ സമിതിയാണ് ജോൺ സാമുവലിനെ നാമനിർദേശം ചെയ്തത്.
കെ.പി.സി.സി യുടെ പൊതുകാര്യനയങ്ങൾ, സാമൂഹിക, സാമ്പത്തിക വിഷയങ്ങളിൽ നേതൃത്വ പരിശീലനം തുടങ്ങിയവയിൽ ജോൺ സാമുവൽ പങ്കാളിയാകും. പാർട്ടിയുടെ സാമൂഹിക സാമ്പത്തിക വികസന ഗവേഷണത്തിനു മാർഗ നിർദേശം നൽകുക, പ്രകടനപത്രിക തയാറാക്കുന്നതിനു സഹായിക്കുക മുതലായവയാണ് പുതിയ പബ്ലിക് പോളിസി വിഭാഗത്തിന്റെ ചുമതല.
ജെ.എസ് അടൂർ എന്ന അപരനാമത്തിൽ അറിയപ്പെടുന്ന എഴുത്തുകാരനായ ജോൺ സാമുവലിന് ഐക്യരാഷ്ട്ര സഭയിലും അന്താരാഷ്ട്ര ദേശീയ വികസന, ഗവേഷണ സംഘടനകളിലും മൂന്നു ദശകത്തെ നേതൃപരിചയുമുണ്ട്.
ഐക്യരാഷ്ട്രസഭയുടെ വികസനവിഭാഗത്തിൽ ആഗോള ഗവർണൻസ് വിഭാഗത്തിന്റെ തലവനായിരുന്നു ജോൺ സാമുവൽ. കേന്ദ്ര പ്ലാനിങ് കമ്മീഷനിൽ ഗവർണൻസ് വർക്കിങ് കമ്മറ്റി അംഗവും കേന്ദ്ര മനുഷ്യാവകാശ കമ്മീഷനിൽ പരിശീലകനുമായിരുന്നു. അഡ്വക്കസി, പൊതു ഭരണം, ബജറ്റ് വിശകലനം, പബ്ലിക് പൊളിസി, മനുഷ്യവകാശങ്ങൾ എന്നീ രംഗത്തു പുസ്തകങ്ങളും പ്രബന്ധങ്ങളും പ്രസിദ്ധീകരിച്ചിട്ടുണ്ട്.
ഇന്ത്യയിലെ ആദ്യ നവ മാധ്യമ സംരംഭമായ ഇൻഫോചേഞ്ച് ഇന്ത്യ, ഗവേഷണ പ്രസിദ്ധീകരണമായ അജണ്ട മാസിക, സിറ്റിസൺ റിപ്പോർട്ട് ഓൺ ഗവണൻസ് ആൻഡ് ഡെവലപ്പ്‌മെന്റ് എന്നിവയുടെ എഡിറ്ററായിരുന്നു. ഏകത പരിഷത്തെന്ന സാമൂഹിക പ്രസ്ഥാനത്തിന്റെ അധ്യക്ഷനായിരുന്നു. ബോധിഗ്രാം എന്ന നേതൃപരിശീലനകേന്ദ്രത്തിന്റെയും സാമൂഹിക പ്രസ്ഥാനത്തിന്റെയും അധ്യക്ഷനാണ്.
പൂന സർവ്വകലാശാലയിൽ നിന്ന് എം.എയും ഗവേഷണ ബിരുദവുമുണ്ട്. സസക്‌സസ് സർവ്വകലാശാലയിലെ ഇൻസ്റ്റിറ്റിയൂട്ട് ഓഫ് ഡെവലപ്പ്‌മെന്റ് സ്റ്റഡീസ്, അഡ്വക്കസി ഇൻസ്റ്റിറ്റിയൂട്ട് വാഷിംഗ്ടൺ എന്നിവിടങ്ങളിൽ ഫെലോ ആയിരുന്നു.
