തൃശൂര്‍- കുട്ടനെല്ലൂരില്‍ വനിതാ ഡോക്ടര്‍ സോന കുത്തേറ്റു മരിച്ച സംഭവത്തില്‍ സുഹൃത്തായ മഹേഷ് അറസ്റ്റിലായി. ഒളിവില്‍ പേയ ഇയാളെ തൃശൂര്‍ പൂങ്കുന്നത്തു നിന്നാണ് അറസ്റ്റ് ചെയ്തത്. കുത്തേറ്റ് ആശുപത്രിയില്‍ പ്രവേശിപ്പിച്ച മൂവാറ്റുപുഴ സ്വദേശി വലിയകുളങ്ങര വീട്ടില്‍ ഡോ.സോന (30) ഞായറാഴ്ചയാണ് മരിച്ചത്.
ചൊവ്വാഴ്ചയാണ് കുട്ടനെല്ലൂരിലെ ദന്താശുപത്രിയില്‍വെച്ച് ഡോക്ടര്‍ക്ക് കുത്തേറ്റത്. സംഭവത്തിന് ശേഷം പാവറട്ടി സ്വദേശിയായ ഇയാള്‍ ഒളിവില്‍ പോകുകയായിരുന്നു. കുട്ടനെല്ലൂരില്‍ ദി ഡെന്റസ്റ്റ് ക്ലിനിക്ക് നടത്തുകയായിരുന്നു ഡോ.സോനയും മഹേഷും. ഇരുവരും ഒരുമിച്ചായിരുന്നു താമസം.
രണ്ട് വര്‍ഷമായി സോനയും മഹേഷും ചേര്‍ന്നാണ് ആശുപത്രി നടത്തിവരുന്നത്. സാമ്പത്തിക ഇടപാടുകളുമായി ബന്ധപ്പെട്ട് ഇരുവരും തമ്മില്‍ തര്‍ക്കമുണ്ടായിരുന്നു. തുടര്‍ന്ന് സോനയും ബന്ധുക്കളും ചൊവ്വാഴ്ച മഹേഷിനെതിരെ പോലീസില്‍ പരാതി നല്‍കി. ഇതിനുപിന്നാലെയാണ് മഹേഷ് ആശുപത്രിയിലെത്തി സോനയെ ആക്രമിച്ചത്.
