തിരുവനന്തപുരം-സംസ്ഥാനത്ത് കോവിഡ് സാഹചര്യം കണക്കിലെടുത്ത് തദ്ദേശ തെരഞ്ഞെടുപ്പില്‍ സ്ഥാനാര്‍ത്ഥികള്‍ വീടിനുള്ളില്‍ കയറി വോട്ട് ചോദിക്കരുതെന്ന് സംസ്ഥാന തെരഞ്ഞെടുപ്പ് കമ്മീഷന്റെ നിര്‍ദേശം. ഒരു ബൂത്തില്‍ ഒരേ സമയം മൂന്ന് വോട്ടര്‍മാരെ മാത്രമേ പ്രവേശിപ്പിക്കാവൂ. തെരഞ്ഞെടുപ്പ് തീയതി തീരുമാനിക്കുന്നതിന് മുന്നോടിയായി ഈ ആഴ്ച ഡിജിപിയുമായി ചര്‍ച്ച നടത്തുമെന്നും കമ്മീഷന്‍ അറിയിച്ചു. വോട്ടഭ്യര്‍ത്ഥിക്കുന്നതിന്റെ ഭാഗമായി വീടുകളില്‍ കയറി വോട്ട് ചോദിക്കാന്‍ പാടില്ല. പുറത്ത് നിന്ന് അകലം പാലിക്കണം. വോട്ടര്‍ സ്ലിപ്പ് കൈയ്യില്‍ കൊടുക്കുന്നതിന് പകരം പുറത്ത് വയ്ക്കണം. പൊതു പ്രചാരണ പരിപാടികള്‍ സംഘടിപ്പിക്കുമ്പോള്‍ അഞ്ച് പേരില്‍ കൂടുതലാവാന്‍ പാടില്ല. പോളിംഗ് ബൂത്തില്‍ പത്ത് ഏജന്റുമാര്‍ മാത്രമേ ഉണ്ടാവാന്‍ പാടുള്ളു എന്നിവയാണ് നിര്‍ദേശങ്ങള്‍.
