കരിപ്പൂരിലെ വിമാനദുരന്തത്തില്‍ രക്ഷാപ്രവര്‍ത്തനത്തിനിറങ്ങിയ മലപ്പുറത്തുകാര്‍ക്ക് ലഭിച്ചു കൊണ്ടിരിക്കുന്ന നന്ദിവാക്കുകളും കടപ്പാടുകളും അവസാനിക്കുന്നില്ല. രണ്ടു ദിവസം മുമ്പ് എയര്‍ ഇന്ത്യ എക്‌സ്പ്രസ് മലപ്പുറത്തുകാര്‍ കാണിച്ച മാനവികതയ്ക്കു മുമ്പില്‍ തലകുനിക്കുന്നുവെന്ന് ട്വീറ്റ് ചെയ്തിരുന്നു. ദുഃഖസൂചകമായി എയര്‍ ഇന്ത്യ എക്‌സ്പ്രസും മാതൃകമ്പനിയായ എയര്‍ ഇന്ത്യയും ട്വിറ്റര്‍ പ്രൊഫൈല്‍ ചിത്രമായി നല്‍കിയ ലോഗോ കറുപ്പും വെളുപ്പുമാക്കുകയും ചെയ്തിട്ടുണ്ട്. കഴിഞ്ഞ ദിവസം #BraveheartsOfMalappuram എന്ന ഹാഷ്ടാഗില്‍ എയർ ഇന്ത്യ മലപ്പുറത്തുകാരുടെ ധീരതയെ വാഴ്ത്തി നാലു പോസ്റ്ററുകള്‍ ട്വീറ്റ് ചെയ്തത് ശ്രദ്ധിക്കപ്പെട്ടു. വളരെ വേഗത്തില്‍ രക്ഷാ പ്രവര്‍ത്തനം പൂര്‍ത്തിയാക്കി നിരവധി ജീവനുകളെ രക്ഷിക്കാന്‍ സഹായിച്ച മലപ്പുറത്തെ രക്ഷാപ്രവര്‍ത്തകര്‍ക്കും കരിപ്പൂരിനും പരിസരത്തുമുള്ള ആശുപത്രികള്‍ക്കും ആരോഗ്യ പ്രവര്‍ത്തകര്‍ക്കും എയര്‍ ഇന്ത്യയുടെ തന്നെ ദുരിതാശ്വാസ സഹായ സംഘമായ ഏഞ്ചല്‍സ് ഓഫ് എയര്‍ ഇന്ത്യയ്ക്കും നന്ദി അറിയിച്ചു കൊണ്ടായിരുന്നു വേറിട്ട ഈ പോസ്റ്റുകള്‍.
എയർ ഇന്ത്യ ട്വിറ്ററിൽ പങ്കുവെച്ച #BraveheartsOfMalappuram പോസ്റ്റർ സീരീസ്
തീർത്തും അപരിചിതരോ? അവർ തീർച്ചയായും അങ്ങനെ ആയിരുന്നില്ല.
ആ മാലാഖമാർ ഉടനടി ദുരന്തമുഖത്ത് കൈത്താങ്ങായി എത്തി
അവർക്ക്, ആ രാത്രി, മഹാമാരി ഒരു തടസ്സമായില്ല
തീരാത്ത കടപ്പാട്...
