റിയാദ് - ലേഡീസ് ബ്യൂട്ടിപാര്‍ലറുകള്‍ പ്രവര്‍ത്തിപ്പിക്കുന്നതുമായി ബന്ധപ്പെട്ട വ്യവസ്ഥകളില്‍ ഉന്നതാധികൃതര്‍ ഭേദഗതികള്‍ വരുത്തി. ബ്യൂട്ടി പാര്‍ലറുകളുടെ നടത്തിപ്പ് ചുമതല സൗദി വനിതാ മാനേജര്‍മാര്‍ ഫുള്‍ടൈം അടിസ്ഥാനത്തില്‍ വഹിക്കണമെന്നതാണ് പ്രധാന ഭേദഗതി. ബ്യൂട്ടിപാര്‍ലറുകളുടെ പ്രവൃത്തി സമയം തൊഴില്‍ നിയമത്തിനും വനിതകളുടെ ജോലിയുമായി ബന്ധപ്പെട്ട മാനവശേഷി, സാമൂഹിക വികസന മന്ത്രാലയ തീരുമാനങ്ങള്‍ക്കും അനുസൃതമായി നിശ്ചയിക്കണമെന്നും വ്യവസ്ഥയുണ്ട്. ലേഡീസ് ബ്യൂട്ടിപാര്‍ലറുകളില്‍ ജോലി ചെയ്യുന്നവര്‍ മുമ്പ് കേസുകളില്‍ ശിക്ഷിക്കപ്പെട്ടവരാകാന്‍ പാടില്ലെന്ന് അനുശാസിക്കുന്ന വകുപ്പ് എടുത്തുകളഞ്ഞിട്ടുമുണ്ട്.
പുതിയ ഭേദഗതികള്‍ ലേഡീസ് ബ്യൂട്ടിപാര്‍ലര്‍ മേഖലയില്‍ നിരവധി സൗദി വനിതകള്‍ക്ക് തൊഴിലവസരങ്ങള്‍ ലഭ്യമാക്കാനും ഈ മേഖലയിലേക്ക് സ്വദേശി വനിതകളെ ആകര്‍ഷിക്കാനും സഹായകമാകുമെന്നാണ് പ്രതീക്ഷിക്കുന്നത്. സൗദിയില്‍ 70,000 ഓളം ലേഡീസ് ബ്യൂട്ടിപാര്‍ലറുകളുണ്ടെന്നാണ് കണക്കാക്കുന്നത്.
