തൊടുപുഴ- രാഷ്ട്രീയത്തിലെ കളയാണ് ജോസ് കെ മാണിയെന്നും ഇത് കളകൾ പറിച്ചുകളയുന്ന കാലമാണെന്നും കേരള കോൺഗ്രസ് നേതാവ് പി.ജെ ജോസഫ്. ജോസ് കെ മാണിയെ യു.ഡി.എഫിൽനിന്ന് പുറത്താക്കിയതുമായി ബന്ധപ്പെട്ടാണ് പി.ജെ ജോസഫിന്റെ പ്രതികരണം. തിന്മയുടെ മേൽ നന്മ നേടിയ വിജയമാണിത്. വിപ്പ് സംബന്ധിച്ച് തെരഞ്ഞെടുപ്പ് കമ്മീഷന്റെ തീരുമാനം ഈ മാസം ഏഴിന് വരുമെന്നും അതിന് ശേഷം കോട്ടയം ജില്ലാ പഞ്ചായത്തിൽ അവിശ്വാസം കൊണ്ടുവരുമെന്നും ജോസഫ് വ്യക്തമാക്കി. തിരുവല്ല നഗരസഭയിലെ ഒൻപതിൽ ഏഴ് കൗൺസിലർമാരും തങ്ങൾക്കൊപ്പം ചേർന്നെന്നും കൂടുതൽ പേർ വരുമെന്നും ജോസഫ് വ്യക്തമാക്കി.
