മലപ്പുറം-കാലിക്കറ്റ് സർവകലാശാലയിൽ വൈസ് ചാൻസലർ നിയമനം വൈകുന്നതിൽ പ്രതിഷേധമുയർത്തി പ്രതിപക്ഷ സർവീസ് സംഘടനകൾ. നിയമനം അനിശ്ചിതത്വത്തിലായതോടെ ഭരണതലത്തിലും അക്കാഡമിക രംഗത്തും ആശങ്കയും താളപ്പിഴവും ഉണ്ടായിരിക്കുകയാണ്. ഈയൊരു സാഹചര്യത്തിലാണ് പ്രതികരണവുമായി പ്രതിപക്ഷ സർവീസ് സംഘടനകൾ രംഗത്തു വന്നിരിക്കുന്നത് .വാഴ്‌സിറ്റിയിൽ സ്ഥിരം വൈസ് ചാൻസലറില്ലാതായിട്ടു ആറു മാസം പിന്നിടുമ്പോഴും പുതിയ വിസിയെ നിയമിക്കുന്ന കാര്യത്തിൽ ഇതുവരെ അന്തിമ തീരുമാനമായില്ല. വിസി നിയമനത്തിനായുള്ള സെർച്ച് കമ്മിറ്റി സർവകലാശാല ചാൻസലർ കൂടിയായ ഗവർണർ ആരിഫ് മുഹമ്മദ് ഖാന് അന്തിമ പട്ടിക മേയ് 18ന് സമർപ്പിച്ചിട്ടും തീരുമാനം വൈകുകയാണ്. സംസ്ഥാന സർക്കാരും ഗവർണറും വിസി നിയമന വിഷയത്തിൽ വ്യത്യസ്ത നിലപാടുകളിലായതിനെ തുടർന്നാണ് അനിശ്ചിതത്വത്തിലായതെന്നാണ് ആക്ഷേപം. എംജി യൂണിവേഴ്‌സിറ്റി അധ്യാപകനായിരുന്ന വ്യക്തിയെ കാലിക്കറ്റ് വിസിയാക്കണമെന്നാണ് സർക്കാർ താൽപ്പര്യം. എന്നാൽ ബിജെപി നോമിനിയായ അധ്യാപകനു വേണ്ടിയുള്ള ബിജെപി സമ്മർദത്തിനു മുന്നിൽ തീരുമാനമാകാതെ നീളുകയാണ് നിയമനം. പാനലിൽ യോഗ്യരായ അപേക്ഷകരുണ്ടായിട്ടും നിയമനം വൈകുന്നത് സർവകലാശാലയുടെ ദൈനംദിന പ്രവർത്തനത്തെ ബാധിക്കുമെന്ന ആശങ്കയും ഉയർന്നിരിക്കുകയാണ്. കാലിക്കറ്റിനു കീഴിൽ റഗുലർ - വിദൂര വിദ്യാഭ്യാസ മേഖലയിലായി ലക്ഷക്കണക്കിനു വിദ്യാർഥികളുണ്ട്. ഇവരുടെയും അധ്യാപകരുടെയും വിദ്യാർഥികളുടെയും ഭാവി നിശ്ചയിക്കുന്ന നിർണായക വിഷയങ്ങളിലെ ഫയലുകളിൽ പലതും തീർപ്പാക്കുന്നതിൽ സ്ഥിരം വിസിയുടെ അഭാവം തടസമാകുന്നുണ്ട്. ഈയൊരു സാഹചര്യത്തിൽ വേഗത്തിൽ നിയമനം നടത്താൻ ഗവർണർ തയാറാകണമെന്ന ആവശ്യവും ശക്തമായിരിക്കുകയാണ്. മുൻ വിസി ഡോ. കെ മുഹമ്മദ് ബഷീർ സ്ഥാനമൊഴിഞ്ഞതിനു ശേഷം മലയാള സർവകലാശാല വൈസ് ചാൻസലർ ഡോ. അനിൽ വള്ളത്തോളിന് കാലിക്കറ്റ്് വിസിയുടെ അധിക ചുമതല നൽകിയിരുന്നു.എന്നാൽ മാസങ്ങൾ കഴിഞ്ഞിട്ടും പുതിയ വിസിയെ നിയമിക്കാത്തതാണ് പ്രതിസന്ധിക്കിടയാക്കിയിരിക്കുന്നത്. ഉയർന്ന യോഗ്യത മാനദണ്ഡമാക്കി മെറിറ്റ് അടിസ്ഥാനത്തിൽ ഗവർണർ വിസിയെ നിയമിക്കാൻ അടിയന്തര നടപടി സ്വീകരിക്കണമെന്ന് മുസ്‌ലീം ലീഗ് അനുകൂല സർവീസ് സംഘടനയായ സോളിഡാരിറ്റി ഓഫ് എംപ്ലോയീസും കോൺഗ്രസ് അനുകൂല സർവീസ് സംഘടനയായ യൂണിവേഴ്‌സിറ്റി സ്റ്റാഫ് ഓർഗനൈസേഷനും ആവശ്യപ്പെട്ടു. കഴിഞ്ഞ മാസം 18നാണ് സെർച്ച് കമ്മിറ്റി പാനൽ ഗവർണർക്ക് സമർപ്പിച്ചത് .എല്ലാ യോഗ്യതയിലും മുമ്പന്തിയിലുള്ള നിയമന ലിസ്റ്റിലെ പട്ടികജാതിക്കാരനെ തഴയാനും നീക്കമുള്ളതായും ആക്ഷേപമുണ്ട്. എന്നാൽ പരിഗണനയിലുള്ള ആരെ ആയാലും വേഗം നിയമനം നടത്തണമെന്നാണ് സർവകലാശാലയിലുള്ളവരുടെ ആവശ്യം.
