കണ്ണൂർ- കണ്ണൂരിൽ കൊറോണ കണ്ടൈൻമെന്റ് സോണിലെ കഠിന നിയന്ത്രണങ്ങൾക്കെതിരേ കോൺഗ്രസ് രംഗത്ത്. നിയമപരമായി ഇളവുകൾ ലഭിക്കണമെന്ന് ആവശ്യപ്പെട്ട് ജനപ്രതിനിധികൾ ഉന്നത പോലീസ് ഉദ്യോഗസ്ഥരുമായി ചർച്ച നടത്തി.
കോവിഡ് കണ്ടൈൻമെന്റ് സോണിന്റെ പേരിൽ പൊലീസ് ജനങ്ങളെ ദ്രോഹിക്കുന്നുവെന്ന പരാതി വ്യാപകമായ സാഹചര്യത്തിലാണ് കെ സുധാകരൻ എം.പി യുടെ നേതൃത്വത്തിൽ ജനപ്രതിനിധികൾ പോലീസ് മേധാവികളുമായി ചർച്ച നടത്തിയത്.
രോഗികൾ, ആരോഗ്യപ്രവർത്തകർ, മാധ്യമ പ്രവർത്തകർ തുടങ്ങി യാത്രാ ഇളവുകൾ ഉള്ളവരിൽ നിന്നായിരുന്നു പരാതികൾ ഉയർന്നത്. ഇതിനു പുറമേ ബാങ്ക് ജീവനക്കാർ,വളണ്ടിയർമാർ, കോടതി ജീവനക്കാർ തുടങ്ങിയവരേയും പോലീസ് തടഞ്ഞുവച്ചതായി പരാതികളുണ്ട്.
പലയിടത്തും മാനദണ്ഡങ്ങൾ ഇല്ലാതെ റോഡുകളും അടച്ചു. സാധ്യമായ ഇളവുകൾ നൽകാമെന്ന് ഐജി അറിയിച്ചതായി ചർച്ചക്കുശേഷം കെ സുധാകരൻ എംപി പറഞ്ഞു.
തദ്ദേശ സ്ഥാപനങ്ങളിലെയും, റവന്യൂ, ആരോഗ്യം എന്നീ വകുപ്പ് പ്രതിനിധികളുമായി ചർച്ച നടത്തിയതിനുശേഷമേ കണ്ടൈൻമെന്റ് സോണുകളിൽ നിയന്ത്രണം ഏർപ്പെടുത്തൂവെന്ന് ഐജി അറിയിച്ചതായും നേതാക്കൾ പറഞ്ഞു.എംഎൽഎ മാരായ കെസി ജോസഫ്, അഡ്വ. സണ്ണി ജോസഫ് എന്നിവരും ചർച്ചയിൽ പങ്കെടുത്തു.
