തിരുവനന്തപുരം- ലോക് ഡൗണിൽ കൂടുതൽ ഇളവുകൾ നൽകിക്കൊണ്ടുള്ള കേന്ദ്ര ആഭ്യന്തരമന്ത്രാലയത്തിന്റെ ഉത്തരവ് ചെറുകിട കച്ചവടക്കാർക്ക് ആശ്വാസമായിരിക്കുമെന്ന് വ്യവസായ വകുപ്പ് മന്ത്രി ഇ.പി ജയരാജൻ. ഇത് സംബന്ധിച്ച് കേരളത്തിന്റെ നിർദ്ദേശം ഇന്നു തന്നെ സംസ്ഥാന സർക്കാർ തയ്യാറാക്കുമെന്നും മന്ത്രി വ്യക്തമാക്കി. എല്ലാ ചട്ടങ്ങളും നിയമങ്ങളും പാലിച്ചു കൊണ്ട് ജാഗ്രതയോടെ ലോക് ഡൗണിലെ ഇളവുകൾ എങ്ങിനെ നടപ്പിലാക്കാം എന്നതിനെക്കുറിച്ച് അടിയന്തിരമായി തീരുമാനമെടുക്കുമെന്നും മന്ത്രി വ്യക്തമാക്കി.
കേന്ദ്രത്തിന്റെ നിർദേശം എങ്ങിനെ സംസ്ഥാനത്ത് നടപ്പിലാക്കാം എന്ന സംസ്ഥാന സർക്കാരിന്റെ നിർദേശം കൂടി കണക്കിലെടുത്തായിരിക്കണം കച്ചവടക്കാർ പ്രവർത്തിക്കേണ്ടത്. സംസ്ഥാന സർക്കാരിന്റെയും ആരോഗ്യ വകുപ്പിന്റെയും നിർദേശങ്ങൾ പാലിച്ചുകൊണ്ട് മാത്രമേ പ്രവർത്തിക്കാവൂ. ഒരു അപകടം നമുക്ക് മുന്നിലുണ്ട് എന്ന ജാഗ്രത എല്ലാവർക്കും ഉണ്ടാകണം. മന്ത്രി പറഞ്ഞു. നഗര പരിധിയ്ക്ക് പുറത്തുള്ള ചെറിയ കടകൾ ഇന്നുമുതൽ തുറക്കാം എന്നാണ് കേന്ദ്ര സർക്കാർ വെള്ളിയാഴ്ച്ച പുറത്തിറക്കിയ ഉത്തരവ് വ്യക്തമാക്കുന്നത്. അതേസമയം ഷോപ്പിങ്ങ് മാളുകൾ ഹോട്ട് സ്‌പോട്ട് മേഖലകളിലെ കടകൾ എന്നിവയ്ക്ക് ഇളവുകൾ ബാധകമല്ല. നഗരപരിധിയ്ക്ക് പുറത്ത് തുറക്കുന്ന കടകൾ പകുതി ജീവനക്കാരെ വച്ചു മാത്രമേ പ്രവർത്തിക്കാവൂ എന്നും നിർദേശമുണ്ട്.
കേന്ദ്ര ഉത്തരവ് പ്രകാരം ഗ്രാമപ്രദേശങ്ങളിലെ കമ്പോളങ്ങൾക്ക് തുറന്ന് പ്രവർത്തിക്കാം. നഗരപ്രദേശങ്ങളിൽ ഷോപ്പിങ്ങ് മാളുകളും കമ്പോളങ്ങളും തുറക്കരുത്. സാമൂഹിക അകലം പാലിക്കുക എന്ന നിർദേശം കർശനമായി പാലിച്ചു മാത്രമേ കടകൾ തുറക്കാവൂ എന്നും കേന്ദ്ര ഉത്തരവ് വ്യക്തമാക്കുന്നു.
