കല്‍പറ്റ-കോവിഡ് പ്രതിരോധ പ്രവര്‍ത്തനങ്ങൡ വയനാട് ജില്ലാ ഭരണകൂടത്തോടു തോളുരുമ്മി അധ്യാപക സമൂഹവും. ജില്ലയിലെ 14 അതിര്‍ത്തി ചെക്‌പോസ്റ്റുകളിലാണ് അധ്യാപകര്‍ വിവിധ വകുപ്പുകളിലെ ഉദ്യോഗസ്ഥര്‍ക്കൊപ്പം സേവനം ചെയ്യുന്നത്. കോവിഡ് പ്രതിരോധ പ്രവര്‍ത്തനങ്ങളില്‍ അധ്യാപകരെയും പങ്കാളികളാക്കാന്‍ സംസ്ഥാനത്ത് ആദ്യം തീരുമാനിച്ചത് വയനാട് ജില്ലാ ഭരണകൂടമാണ്.
ഡോക്ടര്‍ കൂടിയായ ജില്ലാ കലക്ടര്‍ അദീല അബ്ദുല്ല അധ്യാപകരെ ചെക്‌പോസ്റ്റുകളിലാണ് ജോലിക്കു നിയോഗിച്ചത്. ആരോഗ്യം, പോലീസ്, റവന്യൂ, വനം വകുപ്പുകളിലെ ജീവനക്കാരോടൊപ്പമാണ് ചെക്‌പോസ്റ്റുകളില്‍ അധ്യാപകരുടെ സേവനം.
രാവിലെ ഒമ്പതു മുതല്‍ വൈകുന്നേരം ആറു വരെ അധ്യാപികമാരും വൈകുന്നേരം ആറു മുതല്‍ രാവിലെ ഒമ്പതു വരെ അധ്യാപകരുമാണ് ചെക്‌പോസ്റ്റുകളില്‍ ജോലി ചെയ്യുന്നത്. ജില്ലയില്‍ സര്‍ക്കാര്‍, എയ്ഡഡ് സ്‌കൂളുകളിലായി 4,200 ഓളം അധ്യാപകരുണ്ട്. ഇവരെയെല്ലാം കോവിഡ് പ്രതിരോധ പ്രവര്‍ത്തനത്തില്‍ പങ്കാളികളാക്കുംവിധമാണ് ജില്ലാ ഭരണകൂടം ക്രമീകരണം ഏര്‍പ്പെടുത്തിയത്. ദിവസവും രാവും പകലുമായി 56 വീതം അധ്യാപരാണ് എല്ലാ ചെക്‌പോസ്റ്റുകളിലുമായി ജോലിക്കെത്തുന്നത്. ഒരാള്‍ക്കു ഒരു ഷിഫ്റ്റ് മാത്രമാണ് ഡ്യൂട്ടി. സ്വന്തം വാഹനങ്ങളിലാണ് അധ്യാപകരില്‍ അധികവും ജോലിസ്ഥലങ്ങളിലെത്തി വീടുകളിലേക്കു മടങ്ങുന്നത്.
മൂന്ന് ഘട്ടങ്ങളായാണ് അധ്യാപകരെ കോവിഡ് പ്രതിരോധ പ്രവര്‍ത്തനത്തിനു നിയോഗിച്ചത്. മാര്‍ച്ച് 18 മുതല്‍ 31 വരെയായിരുന്നു ആദ്യ നിയമനം. ലോക്ഡൗണ്‍ പ്രഖ്യാപിച്ചതിനാല്‍ ഏപ്രില്‍ ഒന്നു മുതല്‍ ഏഴു വരെയും പിന്നീട്് എട്ടു മുതല്‍ 15 വരെയും അധ്യാപകരെ നിയമിച്ച് ഉത്തരവിറക്കി. എട്ടു പഞ്ചായത്തുകളിലാണ് ജില്ലയിലെ അതിര്‍ത്തി ചെക്‌പോസ്റ്റുകള്‍. നിയമനം ലഭിക്കുന്നവര്‍ ബന്ധപ്പെട്ട മെഡിക്കല്‍ ഓഫീസറുടെ നിര്‍ദേശങ്ങള്‍ക്കനുസരിച്ചാണ് പ്രവര്‍ത്തിക്കുന്നത്. ലോക്ഡൗണ്‍ നീട്ടുന്ന സാഹചര്യത്തില്‍ അധ്യാപകരുടെ സേവനം ഉപയോഗപ്പെടുത്തുന്നതിനു ജില്ലാ ഭരണകൂടം വീണ്ടും ഉത്തരവിറക്കുമെന്നാണ് സൂചന.
ആരോഗ്യപ്രവര്‍ത്തകരെ സഹായിക്കുന്നതിനൊപ്പം ജില്ലയിലേക്ക് പ്രവേശിക്കുന്ന വാഹനങ്ങളുടെ നമ്പര്‍, യാത്രക്കാരുടെ എണ്ണം, യാത്രയുടെ ലക്ഷ്യം, യാത്രക്കാരുടെ പ്രാഥമിക പരിശോധന, യാത്രപോകുന്ന സ്ഥലം, പുറപ്പെട്ട സ്ഥലം തുടങ്ങിയ വിവരങ്ങള്‍ രേഖപ്പെടുത്തുകയാണ് അധ്യാപകരുടെ പ്രധാന ചുമതല. ചെക്‌പോസ്റ്റുകളിലെ ഡ്യൂട്ടി വേറിട്ട അനുഭവമായെന്നു അധ്യാപകര്‍ പറയുന്നു.
ജില്ലാ കലക്ടര്‍, ജില്ലാ പഞ്ചായത്ത് പ്രസിഡന്റ് കെ.ബി.നസീമ, ജില്ലാ മെഡിക്കല്‍ ഓഫീസര്‍ ഡോ.ആര്‍.രേണുക എന്നിവരുടെ നേത്യത്വത്തിലാണ് മുഴുവന്‍ വകുപ്പുകളെയും സന്നദ്ധ പ്രവര്‍ത്തകരെയും ഏകോപിപ്പിച്ച് ജില്ലയില്‍ കോവിഡ് പ്രതിരോധ പ്രവര്‍ത്തനങ്ങള്‍ നടത്തുന്നത്.
