ബുറൈദ - നഗരത്തിൽ പ്രവർത്തിക്കുന്ന ഫർണിഷ്ഡ് അപ്പാർട്ട്‌മെന്റിലുണ്ടായ അഗ്നിബാധയിൽ ആറു പേർക്ക് പരിക്കേറ്റു. അഞ്ചു പേർക്ക് സംഭവസ്ഥലത്തു വെച്ച് റെഡ് ക്രസന്റ് പ്രവർത്തകർ പ്രാഥമിക ശുശ്രൂഷകൾ നൽകി. ഒരാളെ ആശുപത്രിയിലേക്ക് നീക്കി. ഫർണിഷ്ഡ് അപ്പാർട്ട്‌മെന്റ് കെട്ടിടത്തിലെ രണ്ടാം നിലയിലെ സ്റ്റോർ റൂമിൽ ഇന്നലെ പുലർച്ചെയാണ് തീ പടർന്നുപിടിച്ചത്. താമസക്കാരും ജീവനക്കാരും അടക്കം 22 പേരെ സിവിൽ ഡിഫൻസ് അധികൃതർ ഒഴിപ്പിക്കുകയും തീയണക്കുകയും ചെയ്തതായി അൽഖസീം സിവിൽ ഡിഫൻസ് വക്താവ് കേണൽ ഇബ്രാഹിം അബൽഖൈൽ പറഞ്ഞു.
