തിരുവനന്തപുരം- പൗരത്വഭേദഗതിക്ക് എതിരായ സമരങ്ങളില്‍ എസ്ഡിപിഐ നുഴഞ്ഞുകയറാതെ നോക്കണമെന്ന മുഖ്യമന്ത്രിയുടെ പ്രസ്താവനയുടെ വിശ്വാസ്യതയെ ചോദ്യം ചെയ്ത് യൂത്ത് ലീഗ് ജനറല്‍ സെക്രട്ടറി പി.കെ ഫിറോസ്. എസ്ഡിപിഐ പോലുള്ള തീവ്രചിന്താഗതിക്കാരെ ഇത്രകാലം പടിക്ക് പുറത്ത് നിര്‍ത്തിയവരാണ് മഹല്ലുകമമ്മറ്റികള്‍. മഹല്ലുകളില്‍ നിന്ന് എസ്ഡിപിഐയെ പുറത്താക്കാന്‍ കമ്മറ്റികള്‍ കാണിച്ച ആര്‍ജവവും ധീരതയും മുഖ്യമന്ത്രിയുടെ പാര്‍ട്ടി പ്രവര്‍ത്തകരോട് മാതൃകയാക്കാന്‍ പറയണമെന്ന് പി.കെ ഫിറോസ് ആവശ്യപ്പെട്ടു. മുസ്ലിംലീഗിനെ തോല്‍പ്പിക്കാനായി നിങ്ങളുടെ പാര്‍ട്ടിയുടെ പതാക എസ്ഡിപിഐ പതാകയോട് ചേര്‍ത്ത് കെട്ടിയത് പഞ്ചായത്ത് ഭരണസമിതികളില്‍ നിന്നെങ്കിലും ഒഴിവാക്കാന്‍ പറയണം. എസ്ഡിപിഐയെ അകറ്റി നിര്‍ത്താന്‍ ഒരു പഞ്ചായത്ത് ഭരണമെങ്കിലും വേണ്ടെന്ന് പറയാനുള്ള ആര്‍ജ്ജവം കാണിക്കാന്‍ മുഖ്യമന്ത്രി പാര്‍ട്ടി പ്രവര്‍ത്തകരെ ഉപദേശിക്കണമെന്നും പി.കെ ഫിറോസ് പറഞ്ഞു.പൗരത്വഭേദഗതിയെ താറടിക്കാന്‍ സംഘപരിവാര്‍ നടത്തുന്ന നുണപ്രചരണങ്ങളാണ് മുഖ്യമന്ത്രി നടത്തുന്നതെന്നും പി.കെ ഫിറോസ് ആരോപിച്ചു.
കുറിപ്പിന്റെ പൂര്‍ണരൂപം
കേരളത്തിലെ മഹല്ല് കമ്മിറ്റികളെ അപമാനിക്കുകയും പൗരത്വ ഭേഭഗതി നിയമത്തെ എതിര്‍ക്കുന്ന സമരങ്ങളെ ഒറ്റിക്കൊടുക്കുകയും ചെയ്യുന്ന പ്രസ്താവനയാണ് കേരള മുഖ്യമന്ത്രി ശ്രീ. പിണറായി വിജയന്‍ നിയമസഭയില്‍ നടത്തിയത്. മഹാഭൂരിപക്ഷം വരുന്ന മഹല്ല് കമ്മിറ്റികളുടെയും നേതൃത്വം വഹിക്കുന്ന സമസ്തയും അതോടൊപ്പം ബഹു. കാന്തപുരം എ.പി അബൂബക്കര്‍ മുസ്ല്യാര്‍ നേതൃത്വം നല്‍കുന്ന മഹല്ല് കമ്മിറ്റികളും മുജാഹിദ് പ്രസ്ഥാനങ്ങള്‍ നേതൃത്വം നല്‍കുന്ന മഹല്ല് കമ്മിറ്റികളുമൊക്കെ നാളിതു വരെയായി എസ്.ഡി.പി.ഐയെയും അത്തരം തീവ്രവാദ ചിന്താഗതിക്കാരെയും പടിക്കു പുറത്ത് നിര്‍ത്തിയവരാണ്. മഹല്ല് കമ്മറ്റി അംഗമായി പോലും ഇത്തരം ആശയക്കാര്‍ വരാതെ ശ്രദ്ധിക്കുന്നവരാണ്. അങ്ങിനെയുള്ളവര്‍ക്ക് നുഴഞ്ഞ് കയറാനാവാത്ത വിധം അവരുടെ കോട്ട ഭദ്രവുമാണ്.
വസ്തുത ഇതായിരിക്കെ, പൗരത്വഭേഭഗതി നിയമത്തിനെതിരെയുള്ള സമരത്തെ താറടിക്കാന്‍ ആര്‍.എസ്.എസ് നടത്തുന്ന പ്രചരണമാണ് മുഖ്യമന്ത്രി ഇപ്പോള്‍ ഏറ്റെടുത്തിരിക്കുന്നത്. പ്രിയ മുഖ്യമന്ത്രീ, ഇത് അങ്ങയുടെ പദവിക്ക് ചേര്‍ന്നതല്ല. പൗരത്വ നിയമത്തിനെതിരെ മഹല്ല് കമ്മിറ്റികള്‍ നടത്തിയ സമാധാനപരമായ റാലികളില്‍ പങ്കെടുത്തവര്‍ക്കെതിരെ കേസെടുത്ത പോലീസിനെ ന്യായീകരിക്കാന്‍ ഇത്തരം അവാസ്തവവും അപകടകരവുമായ ഒരു കാരണം കണ്ടെത്തുമെന്ന് പ്രതീക്ഷിച്ചില്ല. കേരളത്തില്‍ സി.എ.എ വിരുദ്ധ സമരങ്ങളില്‍ എവിടെയും അക്രമം റിപ്പോര്‍ട്ട് ചെയ്തിട്ടില്ല. അങ്ങയുടെ പൊലീസ് എഴുതിയുണ്ടാക്കുന്ന കള്ളക്കേസുകളാണ് എല്ലാം. പാര്‍ട്ടി ജില്ലാ ഘട്ടത്തിന്റെ നിലപാട് പോലും തള്ളി യു.എ.പി.എ ചുമത്തിയ വിഷയത്തില്‍ പോലിസിനെ ന്യായീകരിച്ച നിലപാടിന്റെ തുടര്‍ച്ചയായെ ഇതിനെ കാണാന്‍ സാധിക്കു. ഇതെല്ലാം സംഘ് പരിവാറിന് എത്രത്തോളം ഊര്‍ജ്ജം പകരുന്നു എന്ന് അങ്ങ് ചിന്തിച്ചിട്ടുണ്ടോ ..?
മുഖ്യമന്ത്രി മിനിമം ഒരു കാര്യം ചെയ്യണം. മഹല്ലുകളില്‍ നിന്നും എസ്.ഡി.പി.ഐ യെ പുറത്താക്കാന്‍ കമ്മിറ്റികള്‍ കാണിച്ച ധീരത അങ്ങയുടെ പാര്‍ട്ടി പ്രവര്‍ത്തകരോട് മാതൃകയാക്കാന്‍ പറയണം. ലീഗിനെ തോല്‍പിക്കാന്‍ വേണ്ടി നിങ്ങളുടെ പാര്‍ട്ടിയുടെ പതാക എസ്.ഡി.പി.ഐയുടെ പതാകയോട് ചേര്‍ത്ത് കെട്ടിയത് പഞ്ചായത്ത് ഭരണസമിതികളില്‍ നിന്നെങ്കിലും ഒഴിവാക്കാന്‍ പറയണം. എസ്.ഡി.പി.ഐയെ അകറ്റി നിര്‍ത്താന്‍ ഒരു പഞ്ചായത്ത് ഭരണമെങ്കിലും വേണ്ടെന്ന് വെക്കാനുള്ള മനസ്സ് കാണിക്കാന്‍ പാര്‍ട്ടി പ്രവര്‍ത്തകരെ ഉപദേശിക്കണം. അതാണല്ലോ യഥാര്‍ത്ഥ ഹീറോയിസം. ചുരുങ്ങിയത് അത്രയെങ്കിലും ചെയ്തിട്ടു മതി സമര പോരാളികളെ ചാപ്പയടിക്കല്‍
