റിയാദ് - തൊഴിൽ, സാമൂഹിക വികസന മന്ത്രാലയത്തിന്റെ പുതിയ മുഖമായ 'ഖിവ' പോർട്ടൽ പുതിയ സേവനങ്ങൾ ഉൾപ്പെടുത്തി പരിഷ്‌കരിച്ചു. വ്യക്തികളും സ്ഥാപനങ്ങളും അടക്കമുള്ള ഉപയോക്താക്കൾക്ക് എളുപ്പത്തിലും പ്രയാസരഹിതമായും സേവനങ്ങൾ ലഭ്യമാക്കുന്നതിനാണ് പോർട്ടൽ പരിഷ്‌കരിച്ചതെന്ന് മന്ത്രാലയം പറഞ്ഞു. മന്ത്രാലയത്തിൽനിന്ന് തൊഴിലുടമകൾക്ക് നൽകുന്ന സേവനങ്ങളിൽ 80 ശതമാനത്തിലേറെ 'ഖിവ' പോർട്ടൽ വഴി ലഭ്യമാണ്.
വ്യവസായികൾക്കുള്ള സേവനങ്ങൾ എളുപ്പമാക്കാൻ 'ഖിവ' പോർട്ടൽ വഴി നൽകുന്ന സേവനങ്ങളിൽ 83 ശതമാനവും പരിഷ്‌കരിച്ചു. ലേബർ ഓഫീസുകളെയോ മറ്റു ബന്ധപ്പെട്ട വകുപ്പുകളെയോ സമീപിക്കേണ്ട ആവശ്യമില്ലാതെ നടപടിക്രമങ്ങൾ കുറഞ്ഞ സമയത്തിനുള്ളിൽ പൂർത്തിയാക്കുന്നതിന് പോർട്ടൽ പരിഷ്‌കരണം സഹായിക്കുന്നു. ലേബർ ഓഫീസുകളിൽനിന്നും മറ്റു ബന്ധപ്പെട്ട വകുപ്പുകളിൽ നിന്നുമുള്ള മുഴുവൻ സേവനങ്ങളും ഇലക്‌ട്രോണിക് രീതിയിൽ ഉപയോക്താക്കൾക്ക് ലഭ്യമാക്കുന്ന പോർട്ടലിലെ സേവനങ്ങൾ പതിവായി പരിഷ്‌കരിക്കുന്നുണ്ട്.
സൗദികളും വിദേശികളും അടക്കമുള്ള സ്വകാര്യ മേഖലയിലെ തൊഴിലാളികളും സംരംഭകരും തമ്മിലുള്ള മീറ്റിംഗ് പോയന്റ് ആയി 'ഖിവ' പോർട്ടലിലെ മാറ്റുന്നതിനും നടപടിക്രമങ്ങൾ വേഗത്തിലാക്കുന്നതിനും ശ്രമിച്ചുവരികയാണ്. വർക്ക് പെർമിറ്റ്, നിലവിലുള്ള സ്ഥാപനങ്ങൾക്കുള്ള തൽക്ഷണ വിസ, ഉടനടിയുള്ള പ്രൊഫഷൻ മാറ്റം, സ്‌പോൺസർഷിപ്പ് മാറ്റം, സ്ഥാപനങ്ങൾക്കുള്ള സൗദിവൽക്കരണ സർട്ടിഫിക്കറ്റ് അടക്കമുള്ള സേവനങ്ങൾ 'ഖിവ' പോർട്ടൽ ഉപയോക്താക്കൾക്ക് നൽകുന്നു. ഇക്കഴിഞ്ഞ ഏപ്രിലിൽ ആണ് തൊഴിൽ, സാമൂഹിക വികസന മന്ത്രാലയം പോർട്ടൽ ആരംഭിച്ചത്.
