തേഞ്ഞിപ്പലം-കാലിക്കറ്റ് സര്‍വകലാശാലാ വൈസ് ചാന്‍സലര്‍ക്കും പ്രോ-വൈസ് ചാന്‍സലര്‍ക്കും സ്നേഹോഷ്മള യാത്രയയപ്പ്. വൈസ് ചാന്‍സലര്‍ ഡോ.കെ.മുഹമ്മദ് ബഷീര്‍, പ്രോ-വൈസ് ചാന്‍സലര്‍ ഡോ.പി.മോഹന്‍, മുന്‍ രജിസ്ട്രാര്‍ ഡോ.ടി.എ.അബ്ദുള്‍ മജീദ്, പരീക്ഷാ മുന്‍ കണ്‍ട്രോളര്‍ ഡോ.വി.വി.ജോര്‍ജുകുട്ടി എന്നിവര്‍ക്ക് സ്റ്റാഫ് വെല്‍ഫയര്‍ ഫണ്ടിന്റെ നേതൃത്വത്തിലാണ് യാത്രയയപ്പ് നല്‍കിയത്. സര്‍വകലാശാലയില്‍ കഴിഞ്ഞ നാലു വര്‍ഷത്തിനുള്ളിലുണ്ടായ വികസനം സര്‍വകലാശാല സമൂഹത്തിന്റെ ഒത്തൊരുമയോടെയുള്ള പ്രവര്‍ത്തനത്തിന്റെ വിജയമാണെന്ന് വിസി ഡോ. കെ മുഹമ്മദ് ബഷീര്‍ പറഞ്ഞു. കാമ്പസില്‍ സമാധാനാന്തരീക്ഷം സൃഷ്ടിക്കാന്‍ സാധിച്ചത് മുഴുവന്‍ ജീവനക്കാരുടെയും വിദ്യാര്‍ഥികളുടെയും സഹകരണം കൊണ്ടാണെന്നും അദ്ദേഹം പറഞ്ഞു. മനുഷ്യത്വപരമായ സമീപനം സ്വീകരിക്കുന്നതിനെ അത്ഭുതമായി കാണുമ്പോള്‍ തനിക്ക് തന്നെ നിരാശയാണെന്നും മനുഷ്യര്‍ മനുഷ്യത്വം തന്നെയാണ് കാട്ടേണ്ടതെന്നും വിസി അഭിപ്രായപ്പെട്ടു. സിന്‍ഡിക്കറ്റ് അംഗം ഡോ.എം.മനോഹരന്‍ യാത്രയയപ്പ് സമ്മേളനം ഉദ്ഘാടനം ചെയ്തു.
