തിരുവനന്തപുരം- സഹപ്രവർത്തകയെ വിവാഹവാഗ്ദാനം നൽകി പീഡിപ്പിച്ച കേസിൽ മാധ്യമപ്രവർത്തകൻ പിടിയിൽ. മാതൃഭൂമി ന്യൂസ് ചാനലിലെ സീനിയർ ന്യൂസ് എഡിറ്റർ അമൽ വിഷ്ണുദാസാണ് പിടിയിലായത്. തിരുവനന്തപുരം സിറ്റി പോലീസ് കമ്മീഷണർക്ക് യുവതി നൽകിയ പരാതിയിലാണ് അറസ്റ്റ്. 2015 ഡിസംബറിലാണ് കേസിനാസ്പദമായ സംഭവം. അമൽ വിഷ്ണുദാസ് ആശുപത്രിയിൽ രോഗിയായി കിടക്കുമ്പോൾ കീഴുദ്യോഗസ്ഥ എന്ന നിലയിൽ ആശുപത്രിയിൽ പോകാറുണ്ടായിരുന്നുവെന്നു തുടർന്നാണ് പ്രേമാഭ്യർത്ഥനയും വിവാഹവാഗ്ദാനവും നൽകിയതെന്നും പരാതിയിൽ പറയുന്നു.
നേരത്തെ വിവാഹിതനായ അമൽ ഭാര്യയുമായി ചില പ്രശ്‌നങ്ങളുണ്ടെന്നും ഉടൻ വിവാഹമോചിതനാകുമെന്നും യുവതിയെ പറഞ്ഞുവിശ്വസിപ്പിച്ചു. ഓഫീസിലും കാറിലുമെല്ലാം വെച്ച് തന്നെ പീഡിപ്പിക്കുകയായിരുന്നുവെന്നും പരാതിയിൽ പറയുന്നു. പിതാവിന്റെ ചികിത്സക്കെന്ന് പറഞ്ഞ് പണം കൈപ്പറ്റിയതായും പീഡനവിവരം പുറത്തുപറഞ്ഞാൽ ജോലി കളയിപ്പിക്കുമെന്ന് ഭീഷണിപ്പെടുത്തിയതായും പരാതിയിലുണ്ട്. അമലിനെ കോടതിയിൽ ഹാജരാക്കി റിമാൻഡ് ചെയ്തു. ഏഷ്യാനെറ്റ് ന്യൂസിലെ മുൻ അവതാരകനായിരുന്നു അമൽ.
