കോഴിക്കോട്- മലബാറിലെ ട്രെയിന്‍ യാത്രക്കാരുടെ ആവശ്യങ്ങള്‍ പരിഗണിച്ച് ഉടന്‍ തന്നെ മെമു സര്‍വീസ് ആരംഭിക്കുമെന്ന് റെയില്‍വേ അറിയിച്ചു. അടുത്ത വര്‍ഷം മാര്‍ച്ചോടെ പാലക്കാട് നിന്ന് മലബാറിലേക്ക് മെമു സര്‍വീസ് നടത്താന്‍ സാധിക്കുമെന്നാണ് റെയില്‍വേയുടെ പ്രതീക്ഷ. സംസ്ഥാനത്ത് നിലവില്‍ കൊല്ലം-എറണാകുളം പാലക്കാട്, കൊല്ലം-തിരുവനന്തപുരം-നാഗോര്‍കോവില്‍ റൂട്ടുകളിലാണ് മെമു സര്‍വീസ് നടത്തുന്നത്.
ഉദ്യോഗസ്ഥരും വിദ്യാര്‍ത്ഥികളുമായി ആയിരക്കണക്കിന് യാത്രക്കാരാണ് മലബാര്‍ മേഖലയില്‍ രാവിലെയും വൈകിട്ടും ട്രെയിനുകളെ ആശ്രയിക്കുന്നത്. ഇവര്‍ക്ക് കോഴിക്കോട്, മംഗളൂരു, കോയമ്പത്തൂര്‍ പാസഞ്ചര്‍ ട്രെയിനുകള്‍ മാത്രമാണ് ഇപ്പോള്‍ ആശ്രയം. ഈ ട്രെയിനുകളില്‍ മതിയായ ബോഗികള്‍ ഇല്ലാത്തതിനാല്‍ യാത്രക്കാര്‍ ഏറെ ബുദ്ധിമുട്ടിലുമാണ്. മെമു വരുന്നതോടെ ഇതിന് വലിയൊരു പരിഹാരമാകും.
14 കോടിയോളം രൂപ ചെലവിട്ട് പാലക്കാട്ടില്‍ മെമു ഷെഡ് നിര്‍മ്മാണം പുരോഗമിക്കുകയാണ്. ത്രിഫേസ് മെമുവായിരിക്കും മലബാറില്‍ ഓടിക്കുക. ആയിരത്തോളം ആളുകള്‍ക്ക് ഇതില്‍ യാത്ര ചെയ്യാനാകും.
