തിരുവനന്തപുരം- രാഷ്ട്ര പിതാവ് മഹാത്മാ ഗാന്ധിയുടെ കൊലയാളികള് തന്നെ ഗാന്ധിജിയെ സ്വന്തമാക്കാന് ശ്രമിക്കുകയാണെന്നും ഈ സാഹചര്യത്തില് ഗാന്ധി ജയന്തി ആഷോഷങ്ങള്ക്ക് പ്രസക്തി വര്ധിക്കുകയാണെന്നും മുഖ്യമന്ത്രി പിണറായി വിജയന്. ഗാന്ധി ജയന്തി ദിനത്തില് ഫേസ്ബുക്കില് കുറിച്ച് സന്ദേശത്തിലാണ് മുഖ്യമന്ത്രി ഇങ്ങനെ പറഞ്ഞത്. ഗാന്ധി വധത്തിന് കുറ്റാരോപണം നേരിട്ട ആര്.എസ്.എസ് നേതാക്കളും അവരുടെ രാഷ്ട്രീയ പാര്ട്ടിയായ ബിജെപിയും ഗാന്ധിജിയെ കൊട്ടിഘോഷിച്ച് ആഘോഷിക്കുന്ന പശ്ചാത്തലത്തിലാണ് പിണറായിയുടെ പ്രതികരണം.
ഫേസ്ബുക്ക് പോസ്റ്റിന്റെ പൂര്ണ രൂപം:
നമ്മുടെ രാഷ്ട്രപിതാവായ മഹാത്മാഗാന്ധിയുടെ നൂറ്റി അമ്പതാം ജന്മവാര്ഷികമാണിന്ന്. സ്വന്തം ജീവിതം തന്നെ ലോകത്തിനുള്ള സന്ദേശമാക്കിയ നേതാവ്. ഗാന്ധിജി ഉയര്ത്തിപ്പിടിച്ച മ്യൂല്യങ്ങള് നൂറ്റാണ്ട് പിന്നിടുമ്പോഴും ഒളിമങ്ങാതെ തിളങ്ങി നില്ക്കുന്നു. എല്ലാ വിഭാഗം ജനങ്ങളേയും ഒന്നായി കാണാനുള്ള വിശാലമായ കാഴ്ചപ്പാട് ഉയര്ത്തിപ്പിടിച്ചായിരുന്നു ഗാന്ധിജിയുടെ ഓരോ ചുവടുവെപ്പും. എന്നാല് രാജ്യത്തെ ഇന്ന് ഗാന്ധിയില് നിന്നും പുറകോട്ട് നടത്താനാണ് ചിലര് ശ്രമിക്കുന്നത്. ഗാന്ധി ഘാതകര് തന്നെ ഗാന്ധിജിയെ സ്വന്തമാക്കാന് ശ്രമിക്കുന്നു. ഗാന്ധിജിയുടെ വാചകങ്ങളെ ഇവര് തങ്ങള്ക്ക് അനുകൂലമായി വ്യാഖ്യാനിക്കാന് ശ്രമിക്കുന്നു . ഈ സാഹചര്യത്തില് ഇത്തവണത്തെ ഗാന്ധി ജയന്തി ദിനാഘോഷങ്ങള്ക്ക് പ്രസക്തി വര്ധിക്കുന്നു.രാഷ്ട്രപിതാവായ ഗാന്ധിജിയേയും ആശയങ്ങളേയും നിലനിര്ത്തുമെന്ന പ്രതിജ്ഞയാണ് ഈ ദിനത്തില് ഓരോ ഇന്ത്യക്കാരനും ഉറക്കെ ചൊല്ലേണ്ടത്.
