തിരുവനന്തപുരം- പുതിയ സംസ്ഥാന ഗവര്‍ണറായി മുന്‍ കേന്ദ്ര മന്ത്രി ആരിഫ് മുഹമ്മദ് ഖാന്‍ സത്യപ്രതിജ്ഞ ചെയ്തു. രാജ്ഭവനില്‍ നടന്ന ചടങ്ങില്‍ കേരള ഹൈക്കോടതി ചീഫ് ജസ്റ്റിസ് ഋഷികേശ് റോയ് സത്യവാചകം ചൊല്ലിക്കൊടുത്തു. ആദ്യം മലയാളത്തിലും തുടര്‍ന്ന് ഇംഗ്ലീഷിലുമാണ് ഗവര്‍ണര്‍ പ്രതിജ്ഞ ചൊല്ലിയത്. മുഖ്യമന്ത്രി പിണറായി വിജയന്‍, ചീഫ് സെക്രട്ടറി ടോം ജോസ്, ഗവര്‍ണറുടെ ഭാര്യ രേഷ്മ ആരിഫ് എന്നിവരടക്കം ചടങ്ങില്‍ പങ്കെടുത്തു. വ്യാഴാഴ്ച രാവിലെയാണ് ആരിഫ് മുഹമ്മദ് ഖാന്‍ കേരളത്തിലെത്തിയത്. ഇന്നലെ മുഖ്യമന്ത്രിയുമായി കൂടിക്കാഴ്ച നടത്തുകയും ചെയ്തിരുന്നു.
