ജിദ്ദ- ജവാസാത്ത് ഡയറക്ടറേറ്റിന്റെ പുതിയ ഓൺലൈൻ സേവനങ്ങൾ ആഭ്യന്തര മന്ത്രി അബ്ദുൽ അസീസ് ബിൻ സൗദ് രാജകുമാരൻ ഉദ്ഘാടനം ചെയ്തു. കമ്പനികൾക്കും സ്ഥാപനങ്ങൾക്കും ഓൺലൈൻ സേവനങ്ങൾ നൽകുന്ന മുഖീം പോർട്ടൽ വഴി ബിസിനസ് വിസിറ്റ് വിസ ദീർഘിപ്പിക്കൽ, വ്യക്തികൾക്ക് ഓൺലൈൻ സേവനങ്ങൾ നൽകുന്ന അബ്ശിർ പോർട്ടൽ വഴി പ്രൊബേഷൻ കാലത്ത് വിദേശ തൊഴിലാളികൾക്ക് ഫൈനൽ എക്‌സിറ്റ് വിസ നൽകൽ എന്നീ സേവനങ്ങളാണ് ജവാസാത്ത് ഡയറക്ടറേറ്റ് പുതുതായി ആരംഭിച്ചിരിക്കുന്നത്.
ജവാസാത്ത് ഉദ്യോഗസ്ഥർക്കുള്ള ഏതാനും സേവനങ്ങളും പുതുതായി ഓൺലൈൻവൽക്കരിച്ചിട്ടുണ്ട്. ബധിരരെയും മൂകരെയും ലക്ഷ്യമിട്ട് ഇശാറ എന്ന പേരിൽ പുതിയ ഓൺലൈൻ സേവനവും ജവാസാത്ത് ഡയറക്ടറേറ്റ് ആരംഭിച്ചിട്ടുണ്ട്. ഇഖാമ പുതുക്കൽ, പുതിയ ഇഖാമക്കുള്ള നടപടിക്രമങ്ങൾ, റീ-എൻട്രി, ഫൈനൽ എക്‌സിറ്റ്, പുതിയ സൗദി പാസ്‌പോർട്ട്, പാസ്‌പോർട്ട് പുതുക്കൽ, വിസിറ്റ് വിസ ദീർഘിപ്പിക്കൽ തുടങ്ങി നിരവധി സേവനങ്ങൾ ജവാസാത്ത് ഡയറക്ടറേറ്റ് ഓൺലൈനിലാക്കി.
മുഴുവൻ സേവനങ്ങളും ഓൺലൈനാക്കി ഉപയോക്താക്കളില്ലാത്ത ഓഫീസുകൾ എന്ന ലക്ഷ്യം സാക്ഷാൽക്കരിക്കുന്നതിനാണ് ജവാസാത്ത് ഡയറക്ടറേറ്റ് ശ്രമിക്കുന്നത്. റീ-എൻട്രിയും ഫൈനൽ എക്‌സിറ്റും അടക്കമുള്ള ജവാസാത്ത് സേവനങ്ങൾ ഏതു സമയത്തും എവിടെ വെച്ചും പ്രയോജനപ്പെടുത്തുന്നതിനും സമയവും അധ്വാനവും ലാഭിക്കുന്നതിനും ഓൺലൈൻ സേവനങ്ങൾ ഉപയോക്താക്കളെ സഹായിക്കുന്നു.
