റിയാദ് - ആറു മാസം വരെ മാത്രമേ ഫാമിലി വിസിറ്റ് വിസ നീട്ടുന്നതിന് സാധിക്കുകയുള്ളൂവെന്ന് ജവാസാത്ത് ഡയറക്ടറേറ്റ് വ്യക്തമാക്കി. ഫാമിലി വിസിറ്റ് വിസ നേടിയവർക്കു തന്നെ കുടുംബാംഗങ്ങളുടെ വിസ ഓൺലൈൻ സേവനമായ അബ്ശിർ വഴി നീട്ടുന്നതിന് സാധിക്കും. വിസാ കാലാവധി അവസാനിക്കുന്നതിന് ഏഴു ദിവസം മുമ്പു മുതലാണ് വിസ നീട്ടേണ്ടത്. വിസാ കാലാവധി അവസാനിച്ച് മൂന്നു ദിവസം പിന്നിടാനും പാടില്ല. വിസാ കാലാവധി അവസാനിക്കുന്നതിന് ഏഴു ദിവസത്തിലധികം മുമ്പും കാലാവധി തീർന്ന് മൂന്നു ദിവസം പിന്നിട്ട ശേഷവും വിസ ദീർഘിപ്പിക്കുന്നതിന് സാധിക്കില്ല. സൗദിയിൽ പ്രവേശിച്ചതു മുതൽ 180 ദിവസത്തിൽ കൂടാത്ത നിലക്കാണ് ഫാമിലി വിസിറ്റ് വിസ പുതുക്കേണ്ടതെന്നും ജവാസാത്ത് ഡയറക്ടറേറ്റ് അറിയിച്ചു.
