മലപ്പുറം- തന്നെ റോഡില്‍ തടഞ്ഞത് മുസ്ലിം ലീഗ് പ്രവര്‍ത്തകരാണെന്നും അവരോട് നടത്തിയത് സ്വാഭാവിക പ്രതികരണമാണെന്നും വിവാദ വീഡിയോയെ കുറിച്ച് മന്ത്രി കെ.ടി.ജലീലിന്റെ വിശദീകരണം. മോന്തക്കൊന്ന് തരുമെന്ന് മന്ത്രി പറയുന്ന ദൃശ്യങ്ങള്‍ സമൂഹ മാധ്യമങ്ങളില്‍ വൈറലായിരുന്നു.
മലപ്പുറം ജില്ലയിലെ ചെട്ടിയാംകിണറിനു സമീപമാണ് സംഭവം. ബൈക്കില്‍നിന്ന് വീണവര്‍ക്ക് സഹായം നല്‍കാന്‍ ഇറങ്ങിയ തന്നെ തടയുകയായിരുന്നുവെന്ന് മന്ത്രി പറഞ്ഞു. സംഭവത്തില്‍ കല്‍പകഞ്ചേരി പോലീസ് കേസെടുത്തിട്ടുണ്ട്.
മോന്തക്കൊന്നു തരും; വൈറലായി മന്ത്രി ജലീലിന്റെ ഭീഷണി
തന്റെ വാഹനത്തിനു മുന്നില്‍ സഞ്ചരിച്ചിരുന്ന ബൈക്കാണ് അപകടത്തില്‍ പെട്ടിരുന്നത്. ഇത് കണ്ട് വാഹനം നിര്‍ത്തി പുറത്തിറങ്ങി കുട്ടികളെ ആശുപത്രിയിലെത്തിക്കാന്‍ വേണ്ട ശ്രമങ്ങള്‍ നടത്തുന്നതിനിടെയാണ് ചിലര്‍ തനിക്കെതിരെ തിരിഞ്ഞത്. തന്റെ വാഹനമിടിച്ചാണ് ബൈക്ക് വീണതെന്ന് തെറ്റിദ്ധരിച്ചാണ് യുവാക്കള്‍ തന്നോട് തട്ടിക്കയറിയതെന്നും മന്ത്രി ജലീല്‍ പറഞ്ഞു.
തന്നെ തടഞ്ഞുവെച്ചപ്പോള്‍ സ്വാഭാവികമായും പ്രതികരിക്കുകയായിരുന്നു. മുസ്ലീംലീഗ് പ്രവര്‍ത്തകരാണ് തനിക്കെതിരെ തിരിഞ്ഞതെന്നും തന്റെ വാഹനം ബൈക്കില്‍ തട്ടിയിട്ടില്ലെന്നും മന്ത്രി കൂട്ടിച്ചേര്‍ത്തു.
വാർത്തകൾ വാട്‌സ്ആപ്പിൽ ലഭിക്കാൻ ഇവിടെ ക്ലിക് ചെയ്ത് ജോയിൻ ചെയ്യുക
മന്ത്രിയുടെ വാഹനം ബൈക്കില്‍ ഇടിച്ചിട്ടില്ലെന്നും ബൈക്കില്‍നിന്ന് വീണവരെ സഹായിക്കാന്‍ പുറത്തിറങ്ങിയ മന്ത്രിയോട് യുവാക്കള്‍ തട്ടിക്കയറുകയായിരുന്നുവെന്നും കല്‍പകഞ്ചേരി പോലീസ് പറഞ്ഞു.
