തലശ്ശേരി - ലോക്‌സഭാ തെരഞ്ഞെടുപ്പിലെ തോൽവിയോടെ പി. ജയരാജനെ രാഷട്രീയ വനവാസത്തിന് അയക്കാമെന്ന സി.പി.എമ്മിലെ ഒരു വിഭാഗത്തിന്റെ നീക്കം അമ്പേ പരാജയപ്പെടുന്നു. കണ്ണൂർ ജില്ലയിലെ പാർട്ടിയിലുടലെടുത്ത കനത്ത വിവാദങ്ങളെ തടയിടാൻ ഇപ്പോൾ പി. ജയരാജനില്ലാതെ നടക്കില്ലെന്ന അവസ്ഥ സംജാതമായിരിക്കുകയാണ്.
തലശ്ശേരിയിലെ സി.ഒ.ടി നസീർ വധശ്രമവും ആന്തൂർ നഗരസഭയിലെ സാജൻ പാറയിലിന്റെ ആത്മഹത്യയും ജില്ലയിലെ പാർട്ടി നേതൃത്വത്തിനുണ്ടാക്കിയ അവമതിപ്പ് ചെറുതല്ല. ഇവിടെയൊക്കെ പാർട്ടിയെ വീറോടെ പിടിച്ച് നിർത്താൻ പി. ജയരാജനെ തന്നെ വേണമെന്ന അവസ്ഥയിലേക്കാണ് നേതൃത്വം എത്തിച്ചേർന്നിരിക്കുന്നത.് ഇതോടെ കണ്ണൂരിലെ പാർട്ടി നേതൃത്വത്തിന്റെ ചുക്കാൻ പി. ജയരാജനിൽ തന്നെ എത്തുമോയെന്ന ചോദ്യവും ഉയരുകയാണ്.
ലോകസഭാ തെരഞ്ഞെടുപ്പിൽ വടകര മണ്ഡലത്തിലെ സ്ഥാനാർത്ഥിയായി പി. ജയരാജനെ നിർത്തിയതോടെ സി.പി.എം ജില്ലാ സെക്രട്ടറി സ്ഥാനത്ത് നിന്ന് ജയരാജനെ ഒഴിവാക്കി പിണറായിയുടെ വിശ്വസ്തനായ എം.വി ജയരാജനെ പ്രതിഷ്ഠിക്കുകയായിരുന്നു. പൊതുജനമധ്യത്തിൽ വെച്ച് പി.കെ ശ്യാമള കുറ്റക്കാരിയാണെന്ന് പി. ജയരാജൻ പറഞ്ഞോടെ ശ്യാമളക്ക് ഇനി പിടിച്ച് നിൽക്കാൻ പറ്റാത്ത അവസ്ഥയിലാണ്. ഇത് എം.വി ഗോവിന്ദനോടുള്ള പകവീട്ടലും കൂടിയായിരുന്നു പി. ജയരാജന്.
വടകര ലോക്‌സഭാ മണ്ഡലത്തിൽ മത്സരിക്കാൻ ജയരാജനെ നിർബന്ധിപ്പിച്ചതിന് പിന്നിൽ എം.വി ഗോവിന്ദനായിരുന്നു. സംസ്ഥാന സെക്രട്ടറി കോടിയേരി ബാലകൃഷ്ണനും എം.വി ജയരാജനും ഇതിന് ശക്തി പകരുകയും ചെയ്തു. ഒടുവിൽ മനസില്ലാ മനസോടെയാണ് ജയരാജൻ വടകരയിൽ ബലിക്കോഴിയായി എത്തിയത്.
ലോക്‌സഭാ തെരഞ്ഞെടുപ്പിൽ വി.എൻ വാസവൻ മത്സരിക്കുന്ന അവസരത്തിൽ കോട്ടയം ജില്ലാ സെക്രട്ടറി സ്ഥാനത്ത് നിന്ന് താൽക്കാലികമായേ അദ്ദേഹത്തെ മാറ്റിയുള്ളൂ. എന്നാൽ കണ്ണൂർ ജില്ലാ സെക്രട്ടറിയായിരുന്ന പി. ജയരാജന്റെ കാര്യത്തിൽ ഈ വിട്ടുവീഴ്ച ചെയ്യാതിരുന്നത് ജയരാജനെ കണ്ണൂരിലെ അണികളിൽ നിന്ന് വേർപെടുത്തുകയെന്ന തന്ത്രത്തിന്റെ ഭാഗമായിരുന്നു. സംസ്ഥാനത്തെ സി.പി.എം ജില്ലാ സെക്രട്ടറിമാരിൽ ഏറ്റവും കരുത്തനായ പി. ജയരാജൻ പാർട്ടിക്ക് മുകളിൽ വളരുമെന്ന് കണ്ട നേതൃത്വത്തിലെ ചിലരുടെ ദുഷ്ടബുദ്ധിയായിരുന്നു സ്ഥാനാർത്ഥിത്വം എന്ന കാര്യത്തിൽ തർക്കമില്ല. പാർട്ടി അണികൾക്ക് പ്രിയപ്പെട്ട ജയരാജനെ പുകഴ്ത്തി ഗാനങ്ങളും ഫഌക്‌സ് ബോർഡുകളും ഉയർത്തുന്നതും പാർട്ടി സംസ്ഥാന സെക്രട്ടറിയേറ്റ് അംഗമായ പി. ഗോവിന്ദനുൾപ്പെടെയുള്ള എതിർ ചേരിയാണ് സംസ്ഥാന നേതൃത്വത്തിൽ ഉയർത്തിക്കാട്ടി വിവാദം സൃഷ്ടിച്ചിരുന്നത.് കീഴാറ്റൂർ സംഭവത്തിൽ പി. ജയരാജനെടുത്ത നിലപാടും പാർട്ടിയിൽ കനത്ത പ്രതിസന്ധി സൃഷ്ടിച്ചിരുന്നു. ഇതും അദ്ദേഹത്തിനെതിരെയുള്ള നീക്കത്തിന് ആക്കം കൂട്ടിയിരുന്നു.
വടകര ലോക്‌സഭാ മണ്ഡലത്തിലെ സ്വതന്ത്ര സ്ഥാനാർത്ഥിയും സി.പി.എമ്മിന് ഇപ്പോൾ അനഭിമതനുമായ മുൻ ലോക്കൽ കമ്മിറ്റി അംഗം സി.ഒ.ടി നസീറിനെ വധിക്കാൻ ശ്രമിച്ച സംഭവവും പി. ജയരാജന്റെ തലയിൽ കെട്ടിവെക്കാൻ പാർട്ടിയിലെ ഒരു വിഭാഗം നീക്കം നടത്തിയിരുന്നു. എന്നാൽ ഇതിനെ തന്ത്രപരമായാണ് പി. ജയരാജൻ നേരിട്ടത.് സംഭവം നടന്ന് രണ്ടാം ദിവസം തന്നെ നസീറിനെ ആശുപത്രിയിൽ സന്ദർശിച്ച് തനിക്ക് ഈ രക്തത്തിൽ പങ്കില്ലെന്ന് ഉറപ്പിച്ച് പ്രഖ്യാപിക്കുകയും ഇതിന് പിന്നിലുള്ളവരെ പുറത്ത് കൊണ്ടുവരാൻ പാർട്ടി നേതൃത്വത്തോട് രേഖാമൂലം ആവശ്യപ്പെടുകയുമായിരുന്നു. ഒടുവിൽ എ.എൻ ഷംസീർ എം.എ.എയാണ് സംഭവത്തിന് പിന്നിലെന്ന് നസീർ പോലീസിനോട് വെളിപ്പെടുത്തിയശേഷം പാർട്ടി നേതൃത്വം തലശ്ശേരിയിൽ നടത്തിയ പൊതുയോഗത്തിലും പി.ജയരാജൻ തന്നെയായിരുന്നു മുഖ്യ പ്രസംഗകൻ. എം.വി ഗോവിന്ദൻ പാർട്ടി നയം വിശദീകരിച്ചെങ്കിലും ജയരാജൻ നസീറിനെ ഉയർത്തിക്കാട്ടുകയായിരുന്നു.
ആന്തൂർ നഗരസഭയിലെ പാർത്ഥ കൺവെൻഷൻ സെന്ററുമായി ബന്ധപ്പെട്ട വിഷയത്തിലും പി. ജയരാജൻ തന്നെയാണ് ഉടമ സാജൻ പാറയിലിന് വേണ്ടി തുടക്കം മുതൽ ഇടപെട്ടു കൊണ്ടിരുന്നത.് ഇത് നഗരസഭാ ചെയർപേഴ്‌സണായ എം.വി ഗോവിന്ദന്റെ ഭാര്യ പി.കെ ശ്യാമളക്ക് ദഹിച്ചില്ല. തളിപ്പറമ്പ് എം.എൽ.എയായ ജയിംസ് മാത്യുവും സാജന് വേണ്ടി എല്ലാ സഹായങ്ങളുമായി കൂടെയുണ്ടായിരുന്നു. എന്നാൽ പാർട്ടി ഗ്രൂപ്പിസം മൂലം ഗോവിന്ദന്റെ ചരട് വലി സാജന് പാരയായി.
ഒടുവിൽ സാജൻ ആത്മഹത്യ ചെയ്തതോടെ പാർട്ടി നേതൃത്വത്തിന് ഈ ഊരാക്കുടുക്കിൽനിന്ന് രക്ഷപ്പെടാൻ സാധിക്കാതെ വന്നു. ഇവിടെയും ഒടുവിൽ രക്ഷകനായത് പി. ജയരാജൻ തന്നെ. ജില്ലാ സെക്രട്ടറി എം.വി ജയരാജന്റെ കൂടെ സാജന്റെ വീട്ടിൽ പോയി കുടുംബത്തെ ആശ്വസിപ്പിക്കാനും സി.പി.എം ധർമ്മശാലയിൽ ശനിയാഴ്ച വൈകിട്ട് നടത്തിയ പൊതുയോഗത്തിലും പി.ജയരാജനെ തന്നെ സി.പിഎമ്മിന് ഇറക്കേണ്ടി വന്നു.
പി.കെ ശ്യാമളയെ കുറ്റപ്പെടുത്തിയുള്ള ധർമ്മശാലയിലെ പി. ജയരാജന്റെ പ്രസംഗം പ്രത്യക്ഷത്തിൽ എം.വി ഗോവിന്ദനോടുള്ള പകവീട്ടൽ തന്നെയായിരുന്നു. ഉദ്യോഗസ്ഥർക്ക് തെറ്റുപറ്റുമ്പോൾ അതിനെ നേരായ വഴി പറഞ്ഞു കൊടുക്കാൻ ജനപ്രതിനിധിക്ക് കഴിയണമെന്ന ജയരാജന്റെ അമ്പ് കുറിക്ക് കൊണ്ടത് ശ്യാമളയുടെ രാജി തന്നെയാണ് അദ്ദേഹത്തിന്റെ ലക്ഷ്യമെന്നതിൽ തർക്കമില്ല. അടുത്ത നിയമസഭാ തെരഞ്ഞെടുപ്പിൽ തളിപ്പറമ്പിൽ നിന്ന് പി.കെ ശ്യാമളയെ മത്സരിപ്പിക്കാനുള്ള എം.വി ഗോവിന്ദൻ വിഭാഗത്തിന്റെ നീക്കത്തിന് തടയിടുകയായിരുന്നു പി. ജയരാജന്റെ നീക്കമെന്നും ഇതിലൂടെ മനസ്സിലാക്കാം.
കോടിയേരി ബാലകൃഷ്ണന്റെ മകൻ ബിനോയ് കോടിയേരിക്കെതിരെ ഇപ്പോൾ ഉയർന്ന ലൈംഗിക വിവാദത്തിന് പിന്നിൽ പി. ജയരാജനെന്ന രീതിയിൽ ഒരു വിഭാഗം അപസ്വരം ഉയർത്തിയിട്ടുണ്ട്.
തനിക്കെതിരെ ശക്തമായി നീങ്ങിയ കോടിയേരിക്കെതിരെയുള്ള കടുത്ത നീക്കമാണ് ജയരാജൻ ബിനോയ് വിഷയത്തിൽ ഉയർത്തിയെതന്നും പാർട്ടിക്കകത്ത് തന്നെ മുറുമുറുപ്പുണ്ട.് ഒന്നിന് പിറകെ ഒന്നായി ഉയരുന്ന വിവാദങ്ങൾ പാർട്ടിയെ പിടിച്ചുലക്കുമ്പോഴും കണ്ണൂരിലെ താരകമായ് പി. ജയരാജൻ ഉദിച്ചുയരുകയാണ്. തന്നെ ഇരുത്താൻ ശ്രമിച്ചവർക്കുള്ള മറുപടി കൂടിയാണ് ജയരാജന്റെ ഇപ്പോഴത്തെ നീക്കം.
