റിയാദ് - അബഹയില്‍ ഡ്രോണ്‍ ആക്രമണം നടത്താനുള്ള ഹൂത്തി മിലീഷ്യകളുടെ ശ്രമം സൗദി സൈന്യം പരാജയപ്പെടുത്തി. ശനിയാഴ്ച രാത്രിയാണ് അബഹയില്‍ ഡ്രോണ്‍ ഉപയോഗിച്ച് ആക്രമണത്തിന് ശ്രമിച്ചത്. ലക്ഷ്യസ്ഥാനത്തെത്തുന്നതിനു മുമ്പായി സൗദി സൈന്യം ഡ്രോണ്‍ വെടിവെച്ചിട്ടതായി സഖ്യസേനാ വക്താവ് കേണല്‍ തുര്‍ക്കി അല്‍മാലികി പറഞ്ഞു.
അബഹ അന്താരാഷ്ട്ര എയര്‍പോര്‍ട്ടും ഖമീസ് മുശൈത്തും ലക്ഷ്യമിട്ട് ഡ്രോണ്‍ ആക്രമണങ്ങള്‍ നടത്തുന്നതിനുള്ള ഹൂത്തി മിലീഷ്യകളുടെ ശ്രമം സൗദി സൈന്യം വെള്ളിയാഴ്ച പരാജയപ്പെടുത്തിയിരുന്നു.
ഹൂത്തികളുടെ അഞ്ചു ഡ്രോണുകളാണ് അന്ന് സൗദി സൈന്യം വെടിവെച്ചിട്ടത്. കഴിഞ്ഞ ബുധനാഴ്ച അബഹ എയര്‍പോര്‍ട്ടില്‍ ഹൂത്തികള്‍ നടത്തിയ മിസൈല്‍ ആക്രമണത്തില്‍ ഇന്ത്യക്കാരി അടക്കം 26 പേര്‍ക്ക് പരിക്കേറ്റിരുന്നു.
