അബുദാബി - ബിഗ് ടിക്കറ്റ് നറുക്കെടുപ്പില്‍ ഒരു കോടി ദിര്‍ഹം (ഏകദേശം 18.85 കോടി രൂപ) സമ്മാനമടിച്ച മലയാളി യുവാവ് ജീവകാരുണ്യ പ്രവര്‍ത്തനത്തിന് അതില്‍ ഒരു ഭാഗം വിനിയോഗിക്കുമെന്ന് പറഞ്ഞു. ബിഗ് ടിക്കറ്റ് നറുക്കെടുപ്പിലാണ് പന്തളം കുടശ്ശനാട് സ്വദേശിയും അബുദാബിയില്‍ സ്വകാര്യ കമ്പനി ഡിസൈനറുമായ സഞ്ജയ് നാഥ് രഘുനാഥിന് ഒരു കോടി ദിര്‍ഹം സമ്മാനമായി ലഭിച്ചത്.
സഹപ്രവര്‍ത്തകരും സുഹൃത്തുക്കളുമായ അഞ്ചു പേര്‍ ചേര്‍ന്നെടുത്ത ടിക്കറ്റിലൂടെയാണ് (കൂപ്പണ്‍ 211711) ഭാഗ്യം കൈവന്നത്. നറുക്കെടുപ്പ് സമയത്ത് മകനുമായി ആശുപത്രിയിലായിരുന്നതിനാല്‍ ബിഗ് ടിക്കറ്റ് വിളിച്ചപ്പോള്‍ ഫോണെടുക്കാനായില്ല. ഒന്നിച്ചു പഠിച്ച സുഹൃത്താണ് ലൈവ് കണ്ട് വിവരം അറിയിച്ചത്. നറുക്കെടുപ്പില്‍ ഒപ്പം ചേര്‍ന്ന എല്ലാവരുടെയും ഭാഗ്യമാണിതെന്ന് 37 കാരന്‍ പറഞ്ഞു. എട്ടാമത് തവണയെടുത്ത ടിക്കറ്റാണ് കോടികളായി മാറിയത്.
12 വര്‍ഷമായി യു.എ.ഇയിലുള്ള സഞ്ജയ് നാഥിന് ഇതാദ്യമായാണ് നറുക്കെടുപ്പില്‍ സമ്മാനം ലഭിക്കുന്നത്. സമ്മാനത്തുക എന്തു ചെയ്യണമെന്ന് തീരുമാനിച്ചിട്ടില്ല. കുടുംബവുമായി ആലോചിച്ച് പിന്നീട് തീരുമാനിക്കും. ജോലിയില്‍ തുടരും. സാമൂഹിക സേവനത്തില്‍ തല്‍പരനായ താന്‍ എല്ലാ മാസവും നിശ്ചിത തുക ജീവകാരുണ്യത്തിനായി വിനിയോഗിക്കുക പതിവാണെന്നും പുതിയ സാഹചര്യത്തിലും അത് തുടരുമെന്നും പറഞ്ഞു.
വ്യവസ്ഥാപിതമായും സുതാര്യമായും നറുക്കെടുത്ത് നിരവധി സാധാരണക്കാരുടെ സ്വപ്നങ്ങള്‍ക്ക് നിറം പകരുന്ന ബിഗ് ടിക്കറ്റിനാണ് സഞ്ജയ് നന്ദി പറയുന്നത്. ഇങ്ങനെയൊരു അവസരം ഒട്ടേറെ പേരുടെ കഷ്ടപ്പാട് അകറ്റുന്നുണ്ട്. അതുകൊണ്ടു തന്നെ ഒരര്‍ഥത്തില്‍ ഇതിന്റെ ഭാഗഭാക്കാകുന്നത് കാരുണ്യ പ്രവര്‍ത്തനമാണെന്നും അത് തുടരുമെന്നും സഞ്ജയ് പറഞ്ഞു. ഭാര്യ ചിത്രയും മക്കളായ നേഹ, നിഹാല്‍ എന്നിവരോടുമൊപ്പം അബുദാബിയിലാണ് താമസം.
ബിനു ഗോപിനാഥ് (1,00,000 ദിര്‍ഹം) ആഷിഖ് പുള്ളിശ്ശേരി (90,000), അനസ് ജമാല്‍ (80,000), സാഖിബ് നാസര്‍ മുഹമ്മദ് നാസര്‍ (70,000), സുഭാഷ് നായപാക്കില്‍ തിക്കല്‍വീട് (50,000), അബ്ദുല്‍ അസീസ് വലിയപറമ്പത്ത് (30,000), സുനില്‍കുമാര്‍ (20,000), അബ്ദുല്‍ മുത്തലിബ് ചുള്ളിയോടന്‍ കോമാച്ചി (10,000), ഗഫൂര്‍ കൂട്ടുങ്ങല്‍ മാമു (10,000) എന്നിവരാണ് മറ്റു വിജയികള്‍. ബംഗ്ലദേശുകാരനായ ഷിപക് ബാരുവയ്ക്കാണ് ലാന്‍ഡ് റോവര്‍ വാഹനം ലഭിച്ചത്.
