ജിസാൻ - പാദരക്ഷകളിൽ വിശുദ്ധ ഖുർആൻ സൂക്തങ്ങൾ രേഖപ്പെടുത്തിയ വിദേശിയെ അബൂഅരീശിൽനിന്ന് സുരക്ഷാ വകുപ്പുകൾ അറസ്റ്റ് ചെയ്തു. അസർ നമസ്‌കാരം നിർവഹിച്ച് പ്രദേശത്തെ മസ്ജിദിൽനിന്ന് പുറത്തിറങ്ങുന്നതിനിടെയാണ് അറബ് വംശജനെ സുരക്ഷാ വകുപ്പുകൾ പിടികൂടിയത്. അസർ നമസ്‌കാരം നിർവഹിക്കുന്നതിന് വൈകിയാണ് വിദേശി മസ്ജിദിലെത്തിയതെന്ന് ദൃക്‌സാക്ഷികൾ പറഞ്ഞു.
വിശ്വാസികളോട് ദാനധർമങ്ങൾ ആവശ്യപ്പെട്ട അറബ് വംശജനെ യാചകവൃത്തി നടത്തിയതിന് സുരക്ഷാ വകുപ്പുകൾ കസ്റ്റഡിയിലെടുത്തു. ഈ സമയത്താണ് പാദരക്ഷകളിൽ ഖുർആൻ സൂക്തങ്ങൾ രേഖപ്പെടുത്തിയത് ശ്രദ്ധയിൽ പെട്ടത്. വിശദമായി ചോദ്യം ചെയ്യുന്നതിനും നിയമ നടപടികൾ സ്വീകരിക്കുന്നതിനും വേണ്ടി അറബ് വംശജനെ അബൂഅരീശ് പോലീസ് സ്റ്റേഷൻ ലോക്കപ്പിൽ അടച്ചു. വിശുദ്ധ ഖുർആനെ നിന്ദിച്ച വിദേശിക്കെതിരെ ഏറ്റവും കടുത്ത ശിക്ഷാ നടപടികൾ സ്വീകരിക്കണമെന്ന് വിശ്വാസികൾ ആവശ്യപ്പെട്ടു.
