ജിസാൻ - അനധികൃത താമസക്കാരായ ആഫ്രിക്കക്കാരെ ദക്ഷിണ സൗദിയിൽ നിന്ന് ജിദ്ദയിലേക്ക് കടത്തുന്നതിനുള്ള സൗദി പൗരന്റെ ശ്രമം ജിസാനിൽ വെച്ച് ഹൈവേ പോലീസ് പരാജയപ്പെടുത്തി. കൂളിംഗ് ഫിലിം ഒട്ടിച്ച് ചില്ലുകൾ മറച്ച കാർ അമിത വേഗതയിൽ സഞ്ചരിക്കുന്നത് ഹൈവേ പോലീസുകാരുടെ ശ്രദ്ധയിൽപെടുകയായിരുന്നു. പിന്തുടർന്ന ഹൈവേ പോലീസുകാർ നിർത്തുന്നതിന് ആവശ്യപ്പെട്ടെങ്കിലും ഡ്രൈവർ കൂട്ടാക്കിയില്ല.
കൂടുതൽ വേഗതയിൽ പോലീസുകാരിൽ നിന്ന് രക്ഷപ്പെടുന്നതിന് ശ്രമിച്ച കാർ ഏറെ നേരം പിന്തുടർന്ന് മുന്നിൽ മാർഗ തടസ്സം സൃഷ്ടിച്ചാണ് തടഞ്ഞുനിർത്തിയത്. കാറിനകത്ത് സ്ത്രീകൾ അടക്കം 25 ആഫ്രിക്കക്കാരെ കണ്ടെത്തി. ഇഖാമയില്ലാത്ത ഇവരെ ജിസാനിൽ നിന്ന് ജിദ്ദയിലേക്ക് കടത്തുന്നതിനാണ് ഡ്രൈവർ ശ്രമിച്ചത്. തുടർ നടപടികൾക്കായി സൗദി പൗരനെയും ആഫ്രിക്കക്കാരെയും ബന്ധപ്പെട്ട വകുപ്പുകൾക്ക് കൈമാറി.
