കോട്ടയം - സൗദിയില്‍ നിന്നും മാറി വന്ന ശ്രീലങ്കന്‍ യുവതിയുടെ മൃതദേഹം നാട്ടിലേക്ക് കൊണ്ടുപോയി. കോട്ടയം മെഡിക്കല്‍ കോളേജ് ആശുപത്രി മോര്‍ച്ചറിയില്‍ സൂക്ഷിച്ചിരിന്ന മൃതദേഹം കോന്നി പോലീസാണ് സൗദിയില്‍ നിന്നെത്തിയ കാര്‍ഗോ പ്രതിനിധികള്‍ക്ക് കൈമാറിയത്. തുടര്‍ന്ന് ഇന്നലെ ഉച്ചകഴിഞ്ഞ് മൃതദേഹം നെടുമ്പാശേരി വിമാനത്താവളത്തേയ്ക്ക് കൊണ്ടുപോയി. വ്യാഴാഴ്ച ഉച്ചയ്ക്കാണ് ശ്രീലങ്കന്‍ യുവതിയായ ബന്ദാരമാണെകി മാലാജിയുടെ മൃതദേഹം സൂക്ഷിക്കുന്നതിനായി കോട്ടയം മെഡിക്കല്‍ കോളേജ് മോര്‍ച്ചറിയില്‍ കോന്നി പോലീസ്എത്തിച്ചത്.
ഫെബ്രുവരി 27ന് സൗദിയില്‍ ഹൃദയാഘാതം മൂലം മരിച്ച കോന്നി കുമ്മണ്ണൂര്‍ ഈട്ടിമൂട്ടില്‍ അബ്ദുല്‍ റസാഖിന്റെ മകന്‍ റഫീഖിന്റെ (28) മൃതദേഹം മാറി ശ്രീലങ്കയിലെത്തുകയും ശ്രീലങ്കന്‍ യുവതിയുടെ മൃതദേഹം കോന്നിയിലെ റഫീഖിന്റെ വീട്ടിലുമെത്തി. ബുധനാഴ്ച വൈകുന്നേരം നെടുമ്പാശ്ശേരി വിമാനത്താവളത്തില്‍ സൗദി എയര്‍ലൈന്‍സില്‍ എത്തിയത്.തുടര്‍ന്ന് ബന്ധുക്കള്‍ മൃതദേഹം രാത്രിയോടെ വീട്ടിലെത്തിച്ചു.
വ്യാഴാഴ്ച രാവിലെ എട്ടിന് ഖബറടക്കുന്നതിനായി മൃതദേഹം അടങ്ങിയ പെട്ടി തുറന്നപ്പോഴാണ് ശ്രീലങ്കന്‍ യുവതിയുടേതാണ് അറിയുന്നത്.തുടര്‍ന്ന് കോന്നി പോലീസില്‍ വിവരം അറിയിച്ചതനുസരിച്ച് പോലീസ് എത്തി മേല്‍നടപടി സ്വീകരിച്ചു. പിന്നീട് ജില്ലാ കലക്ടര്‍ മുഖേന സൗദി കാര്‍ഗോ പ്രതിനിധികളുമായി ബന്ധപ്പെട്ട് തുടര്‍ നടപടി സ്വീകരിക്കുകയായിരുന്നു. യുവതിയുടെ മൃതദേഹം അവരുടെ നാട്ടിലും റഫീഖിന്റെ മൃതദേഹം കോന്നിയിലും എത്തിക്കുന്നതിനുള്ള മുഴുവന്‍ ചെലവുകളും തങ്ങള്‍ വഹിക്കുമെന്ന് കാര്‍ഗോ പ്രതിനിധികള്‍ പറഞ്ഞു.
