മദീന - മദീന പ്രവിശ്യയിൽ ഏപ്രിൽ ആറു മുതൽ ഷോപ്പിംഗ് മാളുകളിൽ സൗദിവൽക്കരണം നടപ്പാക്കുന്നതിന് തീരുമാനം. മദീന ഗവർണറേറ്റുമായി സഹകരിച്ചാണ് മാൾ സൗദിവൽക്കരണം നടപ്പാക്കുക. മാളുകൾക്കു പുറമെ, ചാരിറ്റബിൾ സൊസൈറ്റികളിലും ക്ലോസ്ഡ് വാണിജ്യ കേന്ദ്രങ്ങളിലും ഏപ്രിൽ ആറു മുതൽ സൗദിവൽക്കരണം നിർബന്ധമാക്കും. തൊഴിൽ, സാമൂഹിക വികസന മന്ത്രി എൻജിനീയർ അഹ്മദ് അൽറാജ്ഹിയാണ് ഇതുമായി ബന്ധപ്പെട്ട തീരുമാനം പ്രഖ്യാപിച്ചത്.
ജൂൺ ഒമ്പതു മുതൽ മദീന പ്രവിശ്യയിലെ ഹോട്ടലുകളിലും ടൂറിസം മേഖലാ സ്ഥാപനങ്ങളിലും സൗദിവൽക്കരണം നടപ്പാക്കുന്നതിനും തീരുമാനമുണ്ട്. ക്ലോസ്ഡ് വാണിജ്യ കേന്ദ്രങ്ങളിലെയും ഷോപ്പിംഗ് മാളുകളിലെയും ചാരിറ്റബിൾ സൊസൈറ്റികളിലെയും ഹോട്ടലുകളിലെയും ടൂറിസം മേഖലാ സ്ഥാപനങ്ങളിലെയും തൊഴിലുകൾ സൗദിവൽക്കരിക്കുന്നതിനുള്ള മദീന പ്രവിശ്യ സുപ്രീം സൗദിവൽക്കരണ കമ്മിറ്റിയുടെ തീരുമാനത്തിന്റെ അടിസ്ഥാനത്തിലാണ് തൊഴിൽ, സാമൂഹിക വികസന മന്ത്രി പുതിയ ഉത്തരവിറക്കിയത്.
ലൈറ്റ് വെഹിക്കിൾ ഡ്രൈവർ, ഓർഡർ റിസീവർ, സെക്യൂരിറ്റി ജീവനക്കാരൻ, ഫുഡ് സർവീസ് ജീവനക്കാരൻ, ടെലിഫോൺ സെൻട്രൽ ജീവനക്കാരൻ, ഡാറ്റ എൻട്രി ഓപ്പറേറ്റർ, അഡ്മിനിസ്‌ട്രേറ്റീവ് ക്ലർക്ക്, സെക്രട്ടറി, ജനറൽ സർവീസ് സൂപ്പർവൈസർ, റൂം സർവീസ് സൂപ്പർവൈസർ, മെയിന്റനൻസ് സൂപ്പർവൈസർ, മാർക്കറ്റിംഗ്-സെയിൽസ് സൂപ്പർവൈസർ, സെക്യൂരിറ്റി സൂപ്പർവൈസർ, ഡ്യൂട്ടി സൂപ്പർവൈസർ, ടൂർ പ്രോഗ്രാം സൂപ്പർവൈസർ, ഫ്രന്റ് ഓഫീസ് സൂപ്പർവൈസർ, ടെലിഫോൺ സെൻട്രൽ സൂപ്പർവൈസർ, ലേബർ സൂപ്പർവൈസർ, ഡ്യൂട്ടി മാനേജർ, മെയിന്റനൻസ് മാനേജർ, റൂം സർവീസ് മാനേജർ, കസ്റ്റമർ സർവീസ് മാനേജർ, അഡ്മിനിസ്‌ട്രേറ്റീവ് മാനേജർ, മാർക്കറ്റിംഗ്-സെയിൽസ് റെപ്രസന്റേറ്റീവ്, ടൂർ പ്രോഗ്രാം മാനേജർ, ഫ്രന്റ് ഓഫീസ് മാനേജർ, എംപ്ലോയീ റിലേഷൻസ് മാനേജർ, മാനവശേഷി മാനേജർ, പർച്ചേയ്‌സിംഗ് റെപ്രസന്റേറ്റീവ്, സെയിൽസ് റെപ്രസന്റേറ്റീവ്, സെക്യൂരിറ്റി-തൊഴിൽ സുരക്ഷാ ടെക്‌നീഷ്യൻ, അക്കൗണ്ടന്റ്, മാനവശേഷി സ്‌പെഷ്യലിസ്റ്റ്, മാർക്കറ്റിംഗ് റെപ്രസന്റേറ്റീവ്, ഇവന്റ് മാനേജ്‌മെന്റ് കോ-ഓർഡിനേഷൻ സ്‌പെഷ്യലിസ്റ്റ്, ടിക്കറ്റ് ബുക്കിംഗ് റെപ്രസന്റേറ്റീവ്, ടൂർ പ്രോഗ്രാം ഓപ്പറേറ്റിംഗ് സ്‌പെഷ്യലിസ്റ്റ് എന്നിവ അടക്കമുള്ള തൊഴിലുകളാണ് സൗദിവൽക്കരിക്കുന്നത്. ഓരോ പ്രവിശ്യയിലും സൗദിവൽക്കരണം നടപ്പാക്കുന്നതിന് അനുയോജ്യമായ മേഖലകൾ പ്രത്യേകം നിർണയിച്ച് സ്വദേശിവൽക്കരണം നടപ്പാക്കുന്നതിന് ലക്ഷ്യമിടുന്ന പ്രവിശ്യാ സൗദിവൽക്കരണ പദ്ധതിയുടെ ഭാഗമായാണ് മദീനയിൽ മാളുകളിലും ഹോട്ടലുകളിലും ടൂറിസം മേഖലാ സ്ഥാപനങ്ങളിലും സൗദിവൽക്കരണം നടപ്പാക്കുന്നത്. അൽഖസീം പ്രവിശ്യയിലെ മാളുകളിൽ ഒന്നര വർഷം മുമ്പു മുതൽ സൗദിവൽക്കരണം നിർബന്ധമാക്കിയിട്ടുണ്ട്.
