അബുദാബി- സായിദ് സ്‌പോര്‍ട്‌സ് സിറ്റി സ്റ്റേഡിയത്തില് ഫ്രാന്‍സിസ് മാര്‍പാപ്പയുടെ മുഖ്യ കാര്‍മികത്വത്തില്‍ നടത്തിയ പൊതു കുര്‍ബാനയില്‍ 1.35 ലക്ഷം വിശ്വാസികള്‍ പങ്കെടുത്തത്. ഇന്നു രാവിലെ 10.30 നാണ് കുര്‍ബാന ആരംഭിച്ചത്.
ചരിത്രത്തിലാദ്യമാണ് യു.എ.ഇയില്‍ പൊതുകുര്‍ബാന. സിറോ മലബാര്‍ സഭ മേജര്‍ ആര്‍ച് ബിഷപ് കര്‍ദിനാള്‍ മാര്‍ ജോര്‍ജ് ആലഞ്ചേരി, മലങ്കര കത്തോലിക്കാ സഭാധ്യക്ഷന്‍ മേജര്‍ ആര്‍ച്ച് ബിഷപ് കര്‍ദിനാള്‍ മാര്‍ ബസേലിയോസ് ക്ലീമീസ് കാതോലിക്കാ ബാവാ തുടങ്ങിയവര്‍ പങ്കെടുത്തു. 120 പേരടങ്ങുന്ന ഗായക സംഘമാണു പ്രാര്‍ഥനാഗീതം ആലപിക്കുന്നത്. കൈകൊണ്ടുനിര്‍മിച്ച പിയാനോ ഇതിനായി ഇംഗ്ലണ്ടില്‍നിന്നാണ് കൊണ്ടുവന്നത്.
വിവിധ എമിറേറ്റുകളില്‍നിന്നായി രാത്രിയില്‍തന്നെ ബസുകളില്‍ വിശ്വാസികള്‍ പുറപ്പെട്ടിരുന്നു. 2500 ലേറെ ബസുകളാണ് ഇതിനായി ഭരണകൂടം സൗജന്യമായി വിട്ടുനല്‍കിയത്.
