തിരുവനന്തപുരം- ഖനനം നിര്‍ത്തിവെക്കണമെന്ന നിലപാട് സമരസമിതി ആവര്‍ത്തിച്ചതോടെ ആലപ്പാട് വിഷയത്തില്‍ വ്യവസായ മന്ത്രി ഇ.പി. ജയരാജന്‍ നടത്തിയ ചര്‍ച്ച പരാജയപ്പെട്ടു.
ആലപ്പാട് പഞ്ചായത്തിലെ കരിമണല്‍ ഖനനത്തിനെതിരായ സമരം തുടരുമെന്ന് സമരസമിതി വ്യക്തമാക്കി.
ഖനനം കൊണ്ട് നാട്ടുകാര്‍ക്കു ഗുണമില്ലെന്നും മന്ത്രി നേരിട്ട് വന്ന് കാര്യങ്ങള്‍ മനസ്സിലാക്കണമെന്നും സമരസമിതി വ്യക്തമാക്കി.
ആലപ്പാട്ടെ കരിമണല്‍ ഖനനം സംബന്ധിച്ചു പ്രാഥമിക പഠനം നടത്താന്‍ വിദഗ്ധ സമിതിയെ നിയമിക്കാന്‍ സര്‍ക്കാര്‍ തീരുമാനിച്ചിട്ടുണ്ട്. ദേശീയ ഭൗമശാസ്ത്ര പഠന കേന്ദ്രത്തിലെ പി.എം.പ്രകാശിനാണു ചുമതല. ഒരു മാസത്തിനുള്ളില്‍ റിപ്പോര്‍ട്ട് സമര്‍പ്പിക്കാനാണു നിര്‍ദേശിച്ചിരിക്കുന്നതെന്ന് ആലപ്പാട് സമരസമിതിയുമായി നടത്തിയ ചര്‍ച്ചക്കുശേഷം വ്യവസായമന്ത്രി ഇ.പി.ജയരാജന്‍ പറഞ്ഞു.
ആലപ്പാട്ടെ ഖനന പ്രവര്‍ത്തനങ്ങള്‍ പരിശോധിക്കാന്‍ കൊല്ലം കലക്ടറെ ചെയര്‍മാനാക്കി നിരീക്ഷണ സമിതി രൂപീകരിക്കാന്‍ യോഗം തീരുമാനിച്ചു. കടല്‍ കയറി കര നഷ്ടപ്പെടുന്നത് തടയാന്‍ ഐആര്‍ഇഎല്‍ (ഇന്ത്യന്‍ റയര്‍ എര്‍ത്ത്‌സ് ലിമിറ്റഡ്) പുലിമുട്ട് നിര്‍മിക്കും. വെള്ള മണല്‍ ഉപയോഗിച്ച് ഖനനപ്രദേശത്തെ കുഴികള്‍ നികത്തും. ജനങ്ങളുടെ ആശങ്ക പരിഹരിക്കാനുള്ള നടപടികള്‍ സര്‍ക്കാര്‍ സ്വീകരിക്കുമെന്നും മന്ത്രി പറഞ്ഞു. ഖനനം നിര്‍ത്തിയാല്‍ പൊതുമേഖലാ സ്ഥാപനങ്ങള്‍ എന്തു ചെയ്യുമെന്ന് സമരം ചെയ്യുന്നവര്‍ ആലോചിക്കുമെന്നാണ് പ്രതീക്ഷയെന്ന് ഇ.പി. ജയരാജന്‍ കൂട്ടിച്ചേര്‍ത്തു.
