ഇടുക്കി - ചിന്നക്കനാലിനു സമീപം നടുപ്പാറയില്‍ റിസോര്‍ട്ട് ഉടമയെയും ജോലിക്കാരനെയും കൊല്ലപ്പെട്ട നിലയില്‍ കണ്ടെത്തി. ഗ്യാപ്പ് റോഡിന് താഴ്ഭാഗത്തായി പ്രവര്‍ത്തിക്കുന്ന റിഥം ഓഫ് മെന്‍ഡ്‌സ്, കെ.കെ വര്‍ഗീസ് പ്ലാന്റേഷന്‍സ് എന്നിവയുടെ ഉടമ കോട്ടയം മാന്നാനം കൊച്ചയ്ക്കല്‍ ജേക്കബ് വര്‍ഗീസ് (രാജേഷ്-40), ജോലിക്കാരന്‍ പെരിയകനാല്‍ ടോപ് ഡിവിഷന്‍ എസ്റ്റേറ്റ് ലയത്തിലെ മുത്തയ്യ എന്നിവരാണ് മരിച്ചത്. റിസോര്‍ട്ട് മുറ്റത്ത് നിര്‍ത്തിയിട്ടിരുന്ന ഡസ്റ്റര്‍ കാര്‍ കാണാതായി. ഏതാനും ദിവസങ്ങളായി സ്ഥാപനത്തില്‍ ഡ്രൈവര്‍ ജോലി ചെയ്തുകൊണ്ടിരുന്ന രാജകുമാരി കുളപ്പാറച്ചാല്‍ സ്വദേശി ഗോപനെ സംഭവ ദിവസം മുതല്‍ കാണാനില്ല. മൃതദേഹങ്ങള്‍ക്ക് രണ്ട് ദിവസത്തെ പഴക്കം തോന്നിക്കും. ജില്ലാ പോലീസ് മേധാവി കെ.ബി വേണുഗോപാലിന്റെ നിര്‍ദേശപ്രകാരം മൂന്നാര്‍ ഡിവൈ.എസ്.പി സുനീഷ് ബാബുവിന്റെ നേതൃത്വത്തില്‍ അന്വേഷണമാരംഭിച്ചു.
ഗ്യാപ് റോഡിനു താഴ് ഭാഗത്ത് ഒറ്റപ്പെട്ട സ്ഥലത്തെ 40 ഏക്കറോളം വരുന്ന ഏലത്തോട്ടത്തില്‍ ഹട്ടുകള്‍ ആയാണ് റിസോര്‍ട്ട് പ്രവര്‍ത്തിക്കുന്നത്. മരിച്ച രാജേഷിന്റെ പിതാവ് ഡോ. വര്‍ഗീസ് മൂന്നാറില്‍ ഹാരിസം മലയാളം പ്ലാന്റേഷനില്‍ ജോലി ചെയ്തിരുന്നപ്പോള്‍ വാങ്ങിയ തോട്ടത്തില്‍ റിസോര്‍ട്ട് സ്ഥാപിച്ചതും നടത്തുന്നതും ഇയാളായിരുന്നു.
ആറ് ദിവസം മുമ്പാണ് ഗോപന്‍ ഇവിടെ ജോലിക്ക് എത്തിയത്. വെള്ളിയാഴ്ച വൈകിട്ട് മുതല്‍ രാജേഷിനെയും മുത്തയ്യയെയും കാണാനുണ്ടായിരുന്നില്ല. ശനിയാഴ്ച പുലര്‍ച്ചെ മൂന്ന് വരെ രാജേഷ് വാട്ട്‌സാപ്പില്‍ ഓണ്‍ലൈനില്‍ ഉണ്ടായിരുന്നു. ഇതിന് ശേഷം ബന്ധുക്കള്‍ ഫോണിലേക്ക് വിളിച്ചെങ്കിലും സ്വിച്ച് ഓഫ് ആയിരുന്നു. പിന്നീട് ഇവരെക്കുറിച്ച് വിവരമൊന്നും ലഭിക്കാതിരുന്നതിനെ തുടര്‍ന്ന് മുത്തയ്യയുടെ ബന്ധുക്കളും മറ്റ് ജോലിക്കാരും നാട്ടുകാരും ചേര്‍ന്ന് തെരച്ചില്‍ നടത്തി.
ഞായറാഴ്ച രാവിലെ പതിനൊന്നോടെ എസ്റ്റേറ്റിലെ ഏലക്കാ ഡ്രയര്‍ മുറിയില്‍ മുത്തയ്യ തലയില്‍ പരിക്കുകളോടെ മരിച്ചുകിടക്കുന്നത് കണ്ടു. തുടര്‍ന്ന് നടത്തിയ വിശദമായ തെരച്ചിലില്‍ തോട്ടത്തിലെ ഏലച്ചെടികള്‍ക്കിടെ രാജേഷിനെയും മരിച്ച നിലയില്‍ കണ്ടെത്തുകയായിരുന്നു. ഇയാളുടെ നെഞ്ചില്‍ വെടിയേറ്റതു പോലുള്ള മുറിവുണ്ട്. നാട്ടുകാര്‍ അറിയിച്ചതിനെ തുടര്‍ന്ന് ശാന്തന്‍പാറ സി.ഐ എസ്. ചന്ദ്രകുമാറിന്റെ നേതൃത്വത്തില്‍ പോലിസ് സ്ഥലത്തെത്തി. കോട്ടയം ഫോറന്‍സിക് വിഭാഗം മൃതദേഹ പരിശോധന നടത്തി. സംഭവസ്ഥലത്ത് നിന്നും ആയുധങ്ങളൊന്നും കണ്ടെത്തിയിട്ടില്ല. മൊബൈല്‍ ഫോണും ലഭിച്ചിട്ടില്ല.
രാജേഷിന്റെ മാതാവ്: ഡോ. സുശീല വര്‍ഗീസ്, ഭാര്യ: കെസിയ, ഏക മകള്‍: നതാനിയ. മുത്തുമാരി ആണ് മുത്തയ്യയുടെ ഭാര്യ. മക്കള്‍: പവിത്ര, പവന്‍ കുമാര്‍.
