ദുബായ്- ലോകത്തെ ഏറ്റവും കരുത്തേറിയ പാസ്‌പോര്‍ട്ട് എന്ന പദവിയിലേക്ക് അതിദ്രുതം നീങ്ങുകയാണ് യു.എ.ഇ.
ഒരു മാസത്തിനിടെ, പാസ്‌പോര്‍ട്ട് സൂചികയില്‍ ഒരു പടി കൂടി മുകളിലെത്തിയിരിക്കുകയാണ് യു.എ.ഇ. കഴിഞ്ഞ മാസം ലോകത്തെ ഏറ്റവും ശക്തിയേറിയ എട്ടാമത്തെ പാസ്‌പോര്‍ട്ടായിരുന്നു യു.എ.ഇയുടേത്. ഒറ്റ മാസം കൊണ്ട് ഇത് ഏഴായി ഉയര്‍ന്നു.
159 രാജ്യങ്ങളിലേക്ക് വിസയില്ലാതെ യു.എ.ഇ പാസ്‌പോര്‍ട്ടുള്ളവര്‍ക്ക് യാത്ര ചെയ്യാമിപ്പോള്‍. രണ്ട് വര്‍ഷം മുമ്പ് ഇത് 88 രാജ്യങ്ങളിലേക്ക് മാത്രമായിരുന്നു എന്നോര്‍ക്കുമ്പോഴാണ് യു.എ.ഇയുടെ നേട്ടം എത്ര വേഗത്തിലാണ് എന്ന് ബോധ്യമാകുന്നത്. പാസ്‌പോട്ടുകളുടെ ചരിത്രത്തില്‍ ഏറ്റവും വേഗത്തില്‍ വളരുന്ന പാസ്‌പോര്‍ട്ടാണ് യു.എ.ഇയുടേതെന്ന് ആര്‍ടണ്‍ ക്യാപിറ്റല്‍ മേധാവി ആര്‍മണ്ട് ആര്‍ടണ്‍ പറഞ്ഞു. യു.എ.ഇപ്പോലെ ചെറുപ്പമായ ഒരു രാജ്യത്തെ സംബന്ധിച്ച് ഇത് അപൂര്‍വ നേട്ടമാണ്.
പാസ്‌പോര്‍ട്ടുകളുടെ ശക്തിയുടെ അടിസ്ഥാനത്തില്‍ സിംഗപ്പൂരും ജര്‍മനിയുമാണ് മുന്നില്‍. ഡെന്‍മാര്‍ക്ക്, സ്വീഡന്‍, ഫിന്‍ലാന്റ്, ലക്‌സംബര്‍ഗ്, ഫ്രാന്‍സ്, ഇറ്റലി, നെതര്‍ലാന്റ്‌സ്, സ്‌പെയിന്‍, നോര്‍വേ, ദക്ഷിണ കൊറിയ, യു.എസ് എന്നിവ രണ്ടാം സ്ഥാനത്താണ്.
