- മടപ്പള്ളിയിൽ ഇന്ന് ഹർത്താൽ
വടകര - മടപ്പള്ളി ഗവൺമെന്റ് കോളേജിൽ വിദ്യാർഥി സംഘർഷത്തിൽ നിരവധി പേർക്ക് പരിക്കേറ്റു. സംഘർഷം കോളേജിൽനിന്നും തെരുവിലേക്കിറങ്ങിയപ്പോൾ നാട്ടുകാരും വിദ്യാർഥികളും തമ്മിലും സംഘർഷമുണ്ടായി. ഇതോടെ പോലീസ് ലാത്തി വീശി. സംഘർഷത്തിൽ രണ്ട് നാട്ടുകാർക്കും പരിക്കേറ്റിട്ടുണ്ട്. കോളേജിൽ യു.ഡി.എസ്.എഫ്, ഫ്രറ്റേർണിറ്റി പ്രവർത്തകരും എസ്.എഫ്.ഐയും തമ്മിലായിരുന്നു സംഘർഷം. ഉച്ചയോടെ ആരംഭിച്ച സംഘട്ടനത്തിൽ എം.എസ്.എഫ് നേതാവും ഹരിത ജില്ലാ ജനറൽ സെക്രട്ടറിയുമായ തംജിത, കോളേജിലെ യു.ഡി.എസ്.എഫ് നേതാക്കളായ മുനവ്വിർ, ഫ്രറ്റേണിറ്റി മൂവ്‌മെന്റ് ജില്ലാ കമ്മിറ്റിയംഗം സൽവ അബ്ദുൽ ഖാദർ, കോളേജ് യൂനിറ്റ് പ്രസിഡന്റ് ആദിൽ എന്നിവർക്കും സംഭവമറിഞ്ഞ് എത്തിയ എം.എസ്.എഫ് വടകര മണ്ഡലം ജനറൽ സെക്രട്ടറി മൻസൂർ ഒഞ്ചിയത്തിനും പരിക്കേറ്റു. ഇവരെ വടകര ജില്ലാ ആശുപത്രിയിൽ പ്രവേശിപ്പിച്ചു. എസ്.എഫ്.ഐ പ്രവർത്തകരായ അമൽ, അനൂജ് എന്നിവർക്കും പരിക്കേറ്റു. ഇവരെ വടകര സഹകരണ ആശുപത്രിയിലും പ്രവേശിപ്പിച്ചു. മടപ്പള്ളി കോളേജിനടുത്ത് ബേക്കറി നടത്തുന്ന മനോഹരൻ, ഊരാളി വീട്ടിൽ മനോജ് എന്നിവർക്കാണ് പരിക്കേറ്റത്. ഇവരെ മാഹി ആശുപത്രിയിൽ പ്രവേശിപ്പിച്ചു. കോളേജിലെ വനിതാ നേതാക്കളെ ആക്രമിക്കുന്നത് കണ്ട് ഇടപെട്ടതാണെന്ന് നാട്ടുകാർ പറഞ്ഞു. സംഭവത്തിൽ പ്രതിഷേധിച്ച് യു.ഡി.എസ്.എഫ് പ്രവർത്തകർ വടകരയിൽ പ്രകടനം നടത്തി.
അക്രമത്തിൽ പരിക്കേറ്റവരെ മുല്ലപ്പള്ളി രാമചന്ദ്രൻ എം.പി, വെൽഫെയർ പാർട്ടി സംസ്ഥാന വൈസ് പ്രസിഡന്റ് റസാഖ് പാലേരി, ഫ്രറ്റേണിറ്റി ജില്ലാ പ്രസിഡന്റ് നഈം ഗഫൂർ, എം.എസ്.എഫ് ജില്ലാ ജനറൽ സെക്രട്ടറി അഫ്‌നാസ് ചോറോട്, മുസ്‌ലിം ലീഗ് നേതാക്കളായ യു. അഷ്‌റഫ്, ഫസൽ തങ്ങൾ, അൻസാർ മുകച്ചേരി, ഹാരിസ് ഒഞ്ചിയം, ജൗഹർ വെള്ളികുളങ്ങര, കെ.എസ്.യു നേതാക്കളായ വി.പി ദുൽഖിഫിൽ, വി.ടി. സൂരജ്, എം.എസ്.എഫ് നേതാക്കളായ കെ.വി. തൻവീർ, അൻസീർ പനോളി, വി.പി. ഷംസീർ തുടങ്ങിയവർ സന്ദർശിച്ചു.
മടപ്പള്ളി ഗവൺമെന്റ് കോളേജിലുണ്ടായ ആക്രമ സംഭവങ്ങൾ എസ്.എഫ്.ഐയുടെ സ്റ്റാലിനിസ്റ്റ് അഴിഞ്ഞാട്ടമാണെന്ന് ഫ്രറ്റേണിറ്റി മൂവ്‌മെന്റ് കോഴിക്കോട് ജില്ലാ പ്രസിഡന്റ് നഈം ഗഫൂർ പറഞ്ഞു. എസ്എഫ്‌ഐ ക്യാമ്പസുകളിലും പുറത്തും തുടർന്നുകൊണ്ടിരിക്കുന്ന സ്റ്റാലിനിസത്തെയും പെൺകുട്ടികൾക്ക് നേരെപ്പോലും ഉണ്ടാകുന്ന നികൃഷ്ടമായ കയ്യേറ്റത്തെയും ഗുണ്ടായിസത്തെയും ചോദ്യം ചെയ്യാനും തുറന്നെതിർക്കാനും കേരളത്തിലെ വിദ്യാർത്ഥി സമൂഹം തയാറാകണമെന്ന് അദ്ദേഹം പറഞ്ഞു.
മടപ്പള്ളിയിൽ ഇന്ന് ഹർത്താൽ
വടകര- മടപ്പള്ളി ഗവ. കോളേജിലെ സംഘർഷവുമായി ബന്ധപ്പെട്ട് ഇന്ന് കാലത്ത് ആറു മണി മുതൽ വൈകീട്ട് ആറു വരെ വ്യാപാരികൾ മടപ്പള്ളിയിൽ ഹർത്താൽ ആചരിക്കും. വിദ്യാർത്ഥി സംഘർഷവുമായി ബന്ധപ്പെട്ട് പെൺകുട്ടികളെ അക്രമിക്കുന്നത് തടയാൻ ചെന്ന രാജാസ് ബേക്കറി ഉടമ മനോഹരനെ അടിച്ചു പരുക്കേൽപ്പിക്കുകയും, ജിതിന്റെ ഉടമസ്ഥതയിലുള്ള അലൂമിനിയം ഫാബ്രിക്കേഷൻ കട അടിച്ചു തകർക്കുകയും ചെയ്ത സംഭവത്തിലാണ് വ്യാപാരികൾ ഹർത്താലിന് അഹ്വാനം ചെയ്തത്. അക്രമത്തിൽ പ്രതിഷേധിച്ച് ഇന്നലെ വൈകീട്ട് വ്യാപാരികൾ മടപ്പള്ളിയിൽ പ്രകടനം നടത്തി.
