ന്യൂദൽഹി- കോവിഡ് അനന്തര ശാരീരിക ആസ്വാസ്ഥ്യത്തെ തുടർന്ന് ആശുപത്രിയിൽ പ്രവേശിപ്പിക്കപ്പെട്ട കോൺഗ്രസ് അധ്യക്ഷ സോണിയ ഗാന്ധി നിരീക്ഷണത്തിൽ തുടരുകയാണെന്ന് പാർട്ടി അറിയിച്ചു. സോണിയയ്ക്കു മൂക്കിൽനിന്നു രക്തസ്രാവമുണ്ടെന്നും ശ്വാസനാളിയിൽ അണുബാധ കണ്ടെത്തിയതായും പാർട്ടി പ്രസ്താവനയിൽ പറയുന്നു.
കഴിഞ്ഞ ഞായറാഴ്ചയാണ് സോണിയയെ ദൽഹിയിലെ ഗംഗാറാം ആശുപത്രിയിൽ പ്രവേശിപ്പിച്ചത്. അതിനു മുമ്പു തന്നെ സോണിയയ്ക്കു കോവിഡ് സ്ഥിരീകരിച്ചിരുന്നു. മൂക്കിൽനിന്നു രക്തസ്രാവമുണ്ടായപ്പോഴാണ് സോണിയയെ ആശുപത്രിയിൽ പ്രവേശിപ്പിച്ചതെന്ന്, പാർട്ടി മാധ്യമ വിഭാഗം മേധാവി ജയറാം രമേശ് പറഞ്ഞു. നാഷനൽ ഹെറാൾഡ് കേസിൽ എൻഫോഴ്‌സ്‌മെന്റ് ചോദ്യം ചെയയ്യാൻ നോട്ടീസ് നൽകിയിരിക്കെയാണ് സോണിയയ്ക്കു ദേഹാസ്വാസ്ഥ്യം ഉണ്ടായത്. കേസിൽ രാഹുൽ ഗാ്ന്ധിയെ ഇഡി മുപ്പതു മണിക്കൂറോളമാണ് ചോദ്യം ചെയ്തത്. വീണ്ടും ഹാജരാവാൻ നോട്ടീസ് നൽകിയിട്ടുണ്ടെങ്കിലും അമ്മയുടെ ആരോഗ്യ സ്ഥിതി ചൂണ്ടിക്കാട്ടി രാഹുൽ സമയം നീട്ടി ചോദിക്കുകയായിരുന്നു.
