തിരുവനന്തപുരം- കൊടും ചൂടിൽ ഉരുകുന്ന സംസ്ഥാനത്ത് വീണ്ടും സൂര്യാഘാത സാധ്യതയെന്ന് മുന്നറിയിപ്പ്.
അഞ്ചു ജില്ലകളിലെ താപനില നാല് ഡിഗ്രി സെൽഷ്യസ് വരെ ഉയരുമെന്നാണ് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകിയിരിക്കുന്നത്. കൊല്ലം, ആലപ്പുഴ, കോട്ടയം, എറണാകുളം, തൃശൂർ ജില്ലകളിൽ അടുത്ത രണ്ട് ദിവസം താപനില മൂന്ന് മുതൽ നാല് ഡിഗ്രി സെൽഷ്യസ് വരെ ഉയരുമെന്നാണ് മുന്നറിയിപ്പ്. 10 ജില്ലകളിൽ താപനില മൂന്ന് ഡിഗ്രി വരെ ഉയരാം.
ജനങ്ങൾക്ക് അതീവ ജാഗ്രതാ നിർദേശമാണ് ദുരന്ത നിവാരണ അതോറിറ്റി നൽകിയിരിക്കുന്നത്. കേന്ദ്ര കാലാവസ്ഥാ വകുപ്പ് പുറപ്പെടുവിച്ച കാലാവസ്ഥാ വിശകലനത്തിൽ 2019 മാർച്ച് 24 ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, തൃശൂർ, പാലക്കാട്, കോഴിക്കോട്, കണ്ണൂർ എന്നീ ജില്ലകളിൽ ഉയർന്ന താപനില ശരാശരിയിൽ നിന്നും 2 മുതൽ 3 ഡിഗ്രി വരെയും, മാർച്ച് 25, 26 തീയതികളിൽ കൊല്ലം, ആലപ്പുഴ, കോട്ടയം, എറണാകുളം, തൃശൂർ ജില്ലകളിൽ ഉയർന്ന താപനില ശരാശരിയിൽ നിന്ന് 3 മുതൽ 4 ഡിഗ്രി സെൽഷ്യസ് വരെയും, തിരുവനന്തപുരം, പത്തനംതിട്ട, പാലക്കാട്, മലപ്പുറം, കോഴിക്കോട്, കണ്ണൂർ ജില്ലകളിൽ ഉയർന്ന താപനില ശരാശരിയിൽ നിന്ന് 2 മുതൽ 3 ഡിഗ്രി സെൽഷ്യസ് വരെയും ഉയരാൻ സാധ്യതയുണ്ടെന്നാണ് മുന്നറിയിപ്പ്.
ഒരു മാസത്തിനിടെ സംസ്ഥാനത്ത് 118 പേർക്ക് സൂര്യാഘാതമേറ്റെന്നാണ് ആരോഗ്യ വകുപ്പിന്റെ കണക്ക്. ഈ ആഴ്ച മാത്രം 55 പേർക്ക് പൊള്ളലേറ്റുവെന്നും ആരോഗ്യ വകുപ്പ് വ്യക്തമാക്കുന്നു. ഇതുവരെ സംസ്ഥാനത്ത് ഒരു മരണമാണ് സ്ഥിരീകരിച്ചിട്ടുള്ളത്. ഇന്നലെ പാറശാല അയിരയിൽ കരുണാകകരൻ (42) മരണപ്പെട്ടത് സൂര്യാഘാതം മൂലമാണെന്നാണ് പ്രാഥമിക നിഗമനം. വയലിൽ കാണപ്പെട്ട ഇദ്ദേഹത്തിന്റെ മൃതദേഹത്തിൽ പൊള്ളലേറ്റ പാടുകളുണ്ട്.
എന്നാൽ മരണം സൂര്യാഘാതം മൂലമാണെന്നത് സ്ഥിരീകരിച്ചിട്ടില്ല. സൂര്യാഘാതം സംഭവിക്കുന്നത് ഒഴിവാക്കാൻ പകൽ 11 മണി മുതൽ വൈകിട്ട് മൂന്ന് മണിവരെ സൂര്യപ്രകാശം ഏൽക്കുന്നത് ഒഴിവാക്കണമെന്ന് ദുരന്ത നിവാരണ അതോറിറ്റി മുന്നറിയിപ്പ് നൽകി. രോഗബാധിതർ ഈ സമയത്ത് സൂര്യപ്രകാശം ഏൽക്കുന്നത് ഒഴിവാക്കണമെന്നും കുട്ടികളെ അവധി പ്രമാണിച്ച് വിനോദ സഞ്ചാരത്തിന് കൊണ്ടുപോകുന്ന സ്‌കൂളുകൾ 11 മുതൽ 3 വരെ കുട്ടികൾക്ക് നേരിട്ട് ചൂട് ഏൽക്കുന്നില്ല എന്ന് ഉറപ്പ് വരുത്തണമെന്നും മുന്നറിയിപ്പുണ്ട്. തുടർന്നുള്ള ദിവസങ്ങളിലും ചൂട് ശരാശരിയിൽ നിന്നും ഉയർന്ന നിലയിൽ തുടരുവാനാണ് സാധ്യതയെന്നും കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകുന്നു.
