Monday , September   24, 2018
Monday , September   24, 2018

അമേരിക്കക്കാരിയുടെ ബ്രഷിൽ അറേബ്യൻ നിറക്കൂട്ട്

മണൽക്കുന്നുകളും മരീചികയും മണൽപരപ്പും അടങ്ങിയ  മരുഭൂ ലോകത്തിന്റെ ആത്മാവ് ചിത്രരചനക്ക് പ്രചോദനമായി മാറുകയാണ്. മരുഭൂമിയിലെ നാടോടികളുടെ രൂപഭാവങ്ങൾക്കും മൂർത്തരൂപം നൽകുന്നു. മരുഭൂ മനുഷ്യരുടെ ചില രൂപഭാവങ്ങൾ  എടുത്തുകാട്ടുന്നതിന്, ബദുവിന്റെ കണ്ണഞ്ചിപ്പിക്കുന്ന തനത് വ്യക്തിത്വം കാൻവാസിൽ ആവിഷ്‌കരിക്കുന്നതായി കിം ഫാർകോ പറയുന്നു.

മരുഭൂമിയെ പ്രണയിച്ച ചിത്രകാരിയാണ് അമേരിക്കക്കാരിയായ കിം ഫാർകൊ. കിഴക്കൻ പ്രവിശ്യയിലെ ദഹ്‌റാനിൽ പെട്രോളിയം കമ്പനിയിൽ ജോലി ചെയ്യുന്ന ഭർത്താവിനൊപ്പം നാലു വർഷം മുമ്പാണ് കിം സൗദിയിലെത്തിയത്. വൈവിധ്യപൂർമായ സംസ്‌കാരങ്ങൾ സമ്മേളിക്കുന്ന ദഹ്‌റാനിലെ വിസ്മയിപ്പിക്കുന്ന പരിസ്ഥിതിയിൽ നിന്ന് തന്റെ കലാസൃഷ്ടികൾക്കു വേണ്ട ആശയങ്ങൾ കിം ചികഞ്ഞെടുക്കുന്നു. 
സൗദി അറേബ്യയുടെ മനോഹാരിത പ്രതിഫലിപ്പിക്കുന്ന പെയിന്റിംഗുകളിലൂടെ സൗദി അറേബ്യയോടുള്ള ആദരവ് പ്രകടിപ്പിക്കുന്ന കിം ഫാർകോ തന്റെ ചുറ്റുപാടുമുള്ള പരിസ്ഥിതി തന്റെ കലാസൃഷ്ടികൾക്കുള്ള പ്രചോദനമായി ഉപയോഗപ്പെടുത്തുകയാണ്. മരുഭൂമിയിലെ സൗദി വനിതകളിൽ ദർശിച്ച ആതിഥേയത്വം, സൗദിയിലെ മനോഹരമായ മരുഭൂമികളോടുള്ള തന്റെ ഇഷ്ടം, ആരെയും മയക്കുന്ന വശ്യമനോഹരമായ മരുഭൂ ചക്രവാളത്തിലെ സൂര്യസ്തമന, ഉദയ ദൃശ്യങ്ങൾ, ആളുകൾ അറബി കാപ്പി ആസ്വദിച്ച് കഴിക്കുന്നത് എന്നിവയെല്ലാം മനോഹരമായ കവിതാശകലം പോലെ തന്റെ പെയിന്റിംഗുകളിൽ കിം ഫാർകോ പ്രതിഫലിപ്പിക്കുന്നു. 
മരുഭൂമിയോടുള്ള തന്റെ പ്രണയ വായ്പ് പെയിന്റിംഗുകളിൽ കിം മൂർത്തീകരിക്കുന്നു. മരുഭൂമിയെ കുറിച്ച തന്റെ കാഴ്ചപ്പാടുകളും മരുഭൂമിയുടെ വേറിട്ടതും അതിവിശിഷ്ടവുമായ ദൃശ്യങ്ങളും തന്റെതായ ചിത്രരചനാ ശൈലിയിലൂടെ കിം കാൻവാസിലേക്ക് പകർത്തുന്നു. മരുഭൂമിയിലെ മണൽതരികൾ ചിത്രരചനക്കുള്ള അസംസ്‌കൃത വസ്തുക്കളായി കിം ഫാർകോയുടെ കൈകളിൽ മാറുന്നു. മരുഭൂമിയുടെ സൗന്ദര്യങ്ങളും ഘടകങ്ങളും കാൻവാസിലേക്ക് ആവാഹിക്കുന്ന കിം മണൽതരികൾ കാൻവാസിൽ ഉറപ്പിച്ച ശേഷം ബ്രഷുകൾ ഉപയോഗിച്ച് ചായം നൽകുകയാണ് ചെയ്യുന്നത്. 


ഒരാൾ സ്വന്തം ആത്മാവും ഓരോ ദിവസവും നേടുന്ന അനുഭവങ്ങളും പ്രകടിപ്പിക്കുന്നതാണ് ചിത്രരചനയെന്ന് കിം പറയുന്നു. മരുഭൂ പ്രകൃതിയിൽ നിന്ന് ആവാഹിക്കുന്ന ആശയങ്ങൾ കാൻവാസിലേക്ക് പകർത്തുകയാണ് ചെയ്യുന്നത്. രാവിലെയും വൈകിട്ടും താൻ മരുഭൂമിയെ സസൂക്ഷ്മം നിരീക്ഷിച്ച് സമയം ചെലവഴിക്കാറുണ്ട്. ഇതിലൂടെ ആത്മാവിനെ തഴുകുന്ന പുതിയ പ്രചോദനങ്ങൾ തനിക്ക് ലഭിക്കുന്നു. ബ്രഷും ചായവും മരുഭൂമണലും ഉപയോഗിച്ച് താൻ മനസ്സിൽ പതിഞ്ഞ ആശയങ്ങൾ വ്യാഖ്യാനിക്കുകയും ബ്രഷ് കൈയിൽ പിടിച്ച് ചുറ്റിലുമുള്ള മരുഭൂ പ്രകൃതിയുടെയും സൗന്ദര്യത്തിന്റെയും കഥകൾ രചിക്കുകയുമാണ്. മരുഭൂമിയുമായുള്ള തന്റെ ബന്ധത്തിന്റെ സ്വഭാവവും മരുഭൂമിയുടെ വശ്യതയും അതുമായുള്ള സമ്പർക്കവും ചിത്രരചനയിലൂടെ പ്രതിഫലിപ്പിക്കുന്നതിന് ശ്രമിക്കുന്നു. മണൽക്കുന്നുകളും മരീചികയും മണൽപരപ്പും അടങ്ങിയ മരുഭൂലോകത്തിന്റെ ആത്മാവ് ചിത്രരചനക്ക് പ്രചോദനമായി മാറുകയാണ്. മരുഭൂമിയിലെ നാടോടികളുടെ രൂപഭാവങ്ങൾക്കും താൻ കൊത്തുപണിയിലൂടെ മൂർത്തരൂപം നൽകുന്നു. മരുഭൂ മനുഷ്യരുടെ ചില രൂപഭാവങ്ങൾ എടുത്തുകാട്ടുന്നതിന്, ബദുവിന്റെ കണ്ണഞ്ചിപ്പിക്കുന്ന തനത് വ്യക്തിത്വം താൻ കാൻവാസിൽ ആവിഷ്‌കരിക്കുന്നതായി കിം ഫാർകോ പറയുന്നു.
സൗദിയിലെ നിരവധി മരുഭൂ പ്രദേശങ്ങൾ സന്ദർശിച്ച കിം അറേബ്യൻ ഉപദ്വീപിലെ മരുഭൂമിക്ക് മറഞ്ഞുകിടക്കുന്ന വശ്യസൗന്ദര്യമുണ്ടെന്ന് മനസ്സിലാക്കുന്നു. മരുഭൂ ജീവിതത്തിന്റെ ലാളിത്യവും മരുഭൂമിയുടെ പ്രകൃതിയും വ്യവസായ, പെട്രോൾ പുരോഗതി പ്രകൃതിയിൽ സൃഷ്ടിക്കുന്ന ആഘാതങ്ങളും തമ്മിലുള്ള വൈരുധ്യത്തിനിടയിൽ, റുബുഉൽഖാലി മരുഭൂമിയിലെ മണൽപരപ്പും ഉയരം കൂടിയ മണൽകുന്നുകളും മനോഹരമായ മേളപ്പൊരുത്തത്തിലാണ്. കിം ഫാർകോയുടെ നൈസർഗികതയും ആത്മചോദനയും അന്തർഭാവനയും ലോല വികാരങ്ങളും നിറങ്ങൾ തെരഞ്ഞെടുക്കുന്നതിലെ സുധീരതയും അവരുടെ പെയിന്റിംഗുകൾ സൂക്ഷ്മായി പരിശോധിക്കുന്നവർക്ക് തൊട്ടറിയുന്നതിന് സാധിക്കും. പ്രചോദനങ്ങൾക്കുള്ള ഉറവിടമായി മരുഭൂ മണലുകൾ സ്വീകരിച്ച്, ചുറ്റുപാടുകളുമായി സ്വന്തം ആത്മാവിനുള്ള ബന്ധവും കലാസൃഷ്ടിക്കും ആവിഷ്‌കാരത്തിനും പ്രകൃതിയെ അവലംബിക്കുന്നതും കിമ്മിന്റെ പെയിന്റിംഗുകൾ വ്യക്തമാക്കുന്നു. 
സൗദിയിലെ ഓരോ പ്രവിശ്യകളിലും മാറിമാറി സഞ്ചരിച്ചതിൽ നിന്ന് ഓരോ പ്രവിശ്യയിലെയും മണലിന്റെ സ്വഭാവം നിറത്തിലും വലിപ്പത്തിലും രൂപത്തിലും ഏറെ വ്യത്യസ്തമാണെന്ന് താൻ കണ്ടെത്തിയതായി കിം പറയുന്നു. സൗദിയിലെ മണലുകൾ മാത്രമാണ് പെയിന്റിംഗുകൾക്ക് താൻ ഉപയോഗിക്കുന്നത്. നിറങ്ങൾക്കും മറ്റു പതിവ് അസംസ്‌കൃത പദാർഥങ്ങൾക്കും പകരം കിം മണൽ ഉപയോഗിക്കുന്നു. ഈ മണൽ തരികളുമായി കിം ഫാർകോയുടെ അന്തരംഗം സംവാദം നടത്തുകയും നിരവധി രഹസ്യങ്ങൾ കിമ്മിനു മുന്നിൽ മണൽതരികൾ വെളിപ്പെടുത്തുകയും ചെയ്യുന്നു. തന്റെ അടിവേര് മരുഭൂമിയിലാണെന്നും മരുഭൂമിയുമായി തനിക്ക് അഭേദ്യമായ ബന്ധമുണ്ടെന്നും ഇപ്പോൾ തനിക്ക് തോന്നുന്നതായി കിം ഫാർകോ പറയുന്നു.