Monday , March   18, 2019
Monday , March   18, 2019

ഒരു മാസത്തിനിടെ അനുവദിച്ചത് മൂന്നര ലക്ഷം ഉംറ വിസ

മക്ക - കഴിഞ്ഞ മാസം ഹജ്, ഉംറ മന്ത്രാലയം അനുവദിച്ചത് മൂന്നര ലക്ഷത്തിലേറെ ഉംറ വിസകൾ. മുഹറം ഒന്നു (സെപ്റ്റംബർ 11) മുതൽ മുഹറം 29 (ഒക്‌ടോബർ 9) വരെയുള്ള കാലത്ത് 3,72,767 ഉംറ വിസകളാണ് അനുവദിച്ചത്. കഴിഞ്ഞ കൊല്ലം ഇതേ കാലയളവിൽ അനുവദിച്ചതിനേക്കാൾ 52 ശതമാനം അധികമാണിത്. കഴിഞ്ഞ കൊല്ലം മുഹറം മാസത്തിൽ 2,43,951 ഉംറ വിസകളാണ് അനുവദിച്ചത്. 
മുഹറം മാസത്തിൽ വിദേശങ്ങളിൽ നിന്ന് 1,46,453 ഉംറ തീർഥാടകർ എത്തി. കഴിഞ്ഞ കൊല്ലം മുഹറം മാസത്തിൽ എത്തിയ ഉംറ തീർഥാടകരെ അപേക്ഷിച്ച് കഴിഞ്ഞ മാസം 138 ശതമാനം അധികം തീർഥാടകർ എത്തി. കഴിഞ്ഞ കൊല്ലം മുഹറം മാസത്തിൽ 61,453 ഉംറ തീർഥാടകർ ആണ് പുണ്യഭൂമിയിൽ എത്തിയത്. കഴിഞ്ഞ മാസം വിദേശങ്ങളിൽ നിന്ന് എത്തിയ തീർഥാടകരിൽ 23,241 പേർ തീർഥാടന കർമം പൂർത്തിയാക്കി സ്വദേശങ്ങളിലേക്ക് തിരിച്ചുപോയി. കഴിഞ്ഞ കൊല്ലം ഇതേ കാലയളവിൽ 5182 വിദേശ തീർഥാടകരാണ് ഉംറ കർമം നിർവഹിച്ച് സ്വദേശങ്ങളിലേക്ക് തിരിച്ചുപോയത്.
മുഹറം മാസം അവസാനത്തെ കണക്കുകൾ പ്രകാരം 1,23,212 തീർഥാടകരാണ് പുണ്യഭൂമിയിലുള്ളത്. ഇവരിൽ 90,916 പേർ മക്കയിലും 34,636 പേർ മദീനയിലുമാണ്. ഈ വർഷം വിദേശങ്ങളിൽ നിന്ന് എത്തിയ ഉംറ തീർഥാടകരിൽ 1,42,715 പേർ വിമാന മാർഗവും 8086 പേർ കരമാർഗവുമാണ് രാജ്യത്ത് പ്രവേശിച്ചത്. കപ്പൽ മാർഗം ആരും എത്തിയില്ല. 
ഈ വർഷം ഏറ്റവും കൂടുതൽ ഉംറ വിസ അനുവദിച്ചത് പാക്കിസ്ഥാനികൾക്കാണ് -1,59,913 വിസകൾ. രണ്ടാം സ്ഥാനത്തുള്ള ഇന്ത്യക്കാർക്ക് 82,581 വിസകളും മൂന്നാം സ്ഥാനത്തുള്ള ഇന്തോനേഷ്യക്കാർക്ക് 56,277 വിസകളും നാലാം സ്ഥാനത്തുള്ള മലേഷ്യക്കാർക്ക് 14,056 വിസകളും അഞ്ചാം സ്ഥാനത്തുള്ള ബ്രിട്ടീഷുകാർക്ക് 9423 വിസകളും അനുവദിച്ചു. ഏറ്റവും കൂടുതൽ തീർഥാടകർ എത്തിയതും പാക്കിസ്ഥാനിൽ നിന്നാണ്. പാക്കിസ്ഥാനിൽ നിന്ന് 69,483 തീർഥാടകർ എത്തി. രണ്ടാം സ്ഥാനത്തുള്ള ഇന്ത്യയിൽ നിന്ന് 39,704 തീർഥാടകരും മൂന്നാം സ്ഥാനത്തുള്ള ഇന്തോനേഷ്യയിൽ നിന്ന് 12,232 തീർഥാടകരും നാലാം സ്ഥാനത്തുള്ള യെമനിൽ നിന്ന് 3299 തീർഥാടകരും അഞ്ചാം സ്ഥാനത്തുള്ള ശ്രീലങ്കയിൽ നിന്ന് 3154 തീർഥാടകരും പുണ്യഭൂമിയിൽ എത്തിയതായും ഹജ്, ഉംറ മന്ത്രാലയം അറിയിച്ചു.  
 

Tags

Latest News