Monday , September   24, 2018
Monday , September   24, 2018

സ്വര്‍ണക്കാപ്പി കുടിക്കാന്‍ ദുബായില്‍ പോകാം

ദുബായ്- അത്ഭുതങ്ങളുടെ നാടാണ് ദുബായ്. ബിസിനസിലാകട്ടെ, ഭാവനയുടെ അങ്ങേയറ്റത്തോളം എത്തും ദുബായിയുടെ പ്രതിഭ. ലോകത്തെ അമ്പരപ്പിക്കുന്ന നിര്‍മിതികള്‍ക്ക് പേരുകേട്ട ദുബായ് ലോകത്തിന്റെ ടൂറിസ്റ്റ് തലസ്ഥാനം മാത്രമല്ല, വാണിജ്യ തലസ്ഥാനം കൂടിയായി മാറിക്കൊണ്ടിരിക്കുകയാണ്. ദുബായില്‍ ഓഫീസില്ലാത്ത രാജ്യാന്തര ബിസിനസ് സ്ഥാപനങ്ങള്‍ കുറവ്.

ദുബായിലെ ബുര്‍ജുല്‍ അറബ് ഹോട്ടലില്‍ ചെന്നാല്‍ സവിശേഷമായ ഒരു പാനീയം നിങ്ങളെ കാത്തിരിക്കുന്നുണ്ട്. അവിടത്തെ ഗോള്‍ഡ് കപ്പുച്ചിനോ കഫേയിലെത്തിയാല്‍ അറബ് ആതിഥ്യത്തിന്റേയും ഇറ്റാലിയന്‍ രുചിയുടേയും രൂപത്തില്‍ സ്വര്‍ണക്കാപ്പി നിങ്ങളെ കാത്തിരിക്കുന്നുണ്ട്. 24 കാരറ്റ് ഇറ്റാലിയന്‍ സ്വര്‍ണമാണ് കാപ്പിയില്‍ അലിഞ്ഞുചേര്‍ന്നിരിക്കുന്നത്. കാപ്പിയുടെ മുകളില്‍ കൊതിപ്പിച്ചുനില്‍ക്കുന്ന പതക്ക് സ്വര്‍ണവര്‍ണമാണ്. 85 ദിര്‍ഹമാണ് കോഫിയുടെ വില.

http://malayalamnewsdaily.com/sites/default/files/filefield_paths/gold-cap.jpg

എമിറേറ്റ്‌സ് പാലസില്‍ 50 ദിര്‍ഹമിന് കിട്ടുന്ന സ്വര്‍ണക്കാപ്പിയെക്കാള്‍ കൂടുതല്‍ സ്വര്‍ണമടങ്ങിയിട്ടുണ്ട് ബുര്‍ജുല്‍ അറബിലെ കാപ്പിയില്‍. ഭക്ഷിക്കാവുന്ന രൂപത്തിലുള്ള സ്വര്‍ണമാണ് ഇതില്‍ ചേര്‍ത്തിരിക്കുന്നത്. ദുബായിലെ അര്‍മാനി ഹോട്ടലും 75 ദിര്‍ഹമിന് സ്വര്‍ണക്കാപ്പി വാഗ്ദാനം ചെയ്യുന്നുണ്ട്.
തുറക്കുന്ന കാലത്ത് ലോകത്തെ ഏറ്റവും ഉയരം കൂടിയ ഹോട്ടലായിരുന്നു ബുര്‍ജുല്‍ അറബ്. കണ്ണഞ്ചിപ്പിക്കുന്ന ഇന്റീറിയറും മറ്റ്  ആഡംബര സൗകര്യങ്ങളും ഇന്നും ഹോട്ടലിനെ ലോകത്തെ മുന്‍നിര ഹോട്ടലുകളില്‍ ഒന്നായി നിലനിര്‍ത്തിയിട്ടുണ്ട്.